Dardanapress organizon trajnim për rolin dhe përgjegjësitë e komiteteve konsultative në Kamenicë

Kamenicë – Organizata Joqeveritare Dardanapress ka organizuar një trajnim me temën “Roli dhe detyrat e anëtarëve të komiteteve konsultative”, në kuadër të projektit “Promovimi i politikave të zhvillimit socio-ekonomik në Komunën e Kamenicës”.

Trajnimi kishte për qëllim avancimin e njohurive dhe forcimin e kapaciteteve të anëtarëve të komiteteve konsultative, me theks në rolin, përgjegjësitë dhe detyrat e tyre në proceset e vendimmarrjes komunale.

Gjatë aktivitetit u diskutua për funksionimin e komiteteve konsultative, me fokus të veçantë në Komitetin për Zhvillim Ekonomik, përgjegjësitë e anëtarëve dhe rëndësinë e komunikimit e bashkëpunimit me institucionet komunale.

Po ashtu, u theksua rëndësia e përfshirjes së qytetarëve në konsultimet publike dhe në proceset e vendimmarrjes lokale, si një element i rëndësishëm për rritjen e transparencës dhe llogaridhënies në nivel komunal.

Në përfundim të trajnimit, u rekomandua fuqizimi i rolit të komiteteve konsultative në vendimmarrjen komunale, përmirësimi i bashkëpunimit me institucionet lokale dhe rritja e transparencës në punën e tyre. Gjithashtu, u theksua nevoja që rekomandimet dhe konkluzionet e mbledhjeve të këtyre komiteteve t’u përcillen organeve përkatëse komunale, me qëllim të shqyrtimit dhe adresimit të tyre.

Projekti “Promovimi i politikave të zhvillimit socio-ekonomik në Komunën e Kamenicës” financohet nga Ministria e Zhvillimit Rajonal./rajonipress/