Rahimaj mban takim pune me drejtorët komunalë, në fokus buxheti, arsimi dhe projektet zhvillimore

Kamenicë – Kryetari i Komunës së Kamenicës, Kadri Rahimaj, ka mbajtur takimin e rregullt të punës me drejtorët e drejtorive komunale, ku është diskutuar për ecurinë e punëve, përmbushjen e detyrave institucionale dhe koordinimin e aktiviteteve në funksion të përmirësimit të shërbimeve për qytetarët.

Gjatë takimit janë shqyrtuar një sërë çështjesh me rëndësi për administrimin dhe zhvillimin e komunës, duke përfshirë draft-rregulloret për Kodin e Etiketave, subvencionet, taksat, tarifat, ngarkesat dhe gjobat, si dhe rregulloret në fushën e arsimit.

Vëmendje e veçantë iu kushtua progresit të shpenzimeve buxhetore, realizimit të kontratave dhe menaxhimit të buxhetit nga drejtoritë komunale. Po ashtu, u diskutua për përgatitjet në sektorin e arsimit për vitin shkollor 2026/2027, si dhe për çështje të tjera që lidhen me administrimin dhe funksionimin e shërbimeve komunale.

Në kuadër të përgatitjeve për aktivitetet kulturore dhe tradicionale, pjesëmarrësit shqyrtuan organizimin e manifestimit “Flaka e Janarit” dhe të aktivitetit “Festi i Dimrit të Kamenicës”, me synimin e koordinimit me kohë të angazhimeve dhe përgjegjësive përkatëse.

Në rend dite ishin edhe raportet lidhur me ndërhyrjet pa leje dhe masat për mbrojtjen e mjedisit, çështjet që kanë të bëjnë me pronat e Agjencisë Kosovare të Privatizimit (AKP) në territorin e komunës dhe mundësitë e shpalljes së tyre në interes publik. Gjithashtu, u diskutua për hartimin dhe përditësimin e profilit të Komunës së Kamenicës, veprimet e reja dhe çështje të tjera me rëndësi për funksionimin institucional.

Kryetari Kadri Rahimaj theksoi rëndësinë e bashkëpunimit dhe koordinimit të vazhdueshëm ndërmjet drejtorive komunale, duke kërkuar përgjegjësi institucionale, angazhim dhe efikasitet në përmbushjen e detyrave dhe obligimeve nga secila drejtori.

Në përfundim të takimit, drejtorët komunalë shprehën gatishmërinë për të vazhduar angazhimin në shërbim të qytetarëve, për të avancuar iniciativat e nisura dhe për të përmirësuar koordinimin në realizimin e objektivave dhe prioriteteve të Komunës së Kamenicës./rajonipress/