Tërnava uron qytetarët për Fitër-Bajram

Myftiu i Kosovës, Naim ef. Tërnava me rastin e Fitër – Bajramit uroi qytetarët e vendit, duke thënë se ky Bajram le të mbetet i atyre të cilët thyen murin e egoizmit, përmes ndihmave, i atyre që bënë nderë dhe ndan kafshatën e bukës për të nevojshmit, treguan qetësinë shpirtërore, vëllazërinë dhe miqësinë.

Ai tha se falënderojnë Allahun xh.sh. i cili edhe njëherë bashkoi zemrat tona gjatë muajit të bekuar të Ramazanit, në të cilin shpirtrat shërohen e mendjet njëmendësohen, e prej kësaj dalin mesazhe plot mëshirë e respekt për njerëzimin mbarë.

“Nesër më 17.07.2015 është dita e parë e Fitër Bajramit, ndaj me këtë rast, kam kënaqësinë që në emër të Bashkësisë Islame të Republikës së Kosovës të institucioneve të saja dhe në emrin tim personal, t’i përgëzoj të gjithë besimtarët për përmbushjen e njërit prej obligimeve kryesore të fesë Islame. Duke e lutur Allahun xh.sh që të na ketë pranuar agjërimin, lutjet ibadetet dhe punët e mira që i kemi bërë gjatë këtij muaji për Krijuesin e këtij Universi”, u shpreh myftiu Tërnava. /Telegrafi/