KPF-ja shqyrton projektbuxhetin 2027–2029, mbi 3.1 milionë euro për investime

Viti – Komiteti për Politikë dhe Financa (KPF) i Komunës së Vitisë ka mbajtur mbledhjen e radhës, të udhëhequr nga kryesuesi i Kuvendit Komunal, Bekim Azizi. Në mbledhje mori pjesë edhe zëvendëskryetari i Komunës, Hasan Aliu.

Në fillim të mbledhjes, kryesuesi Azizi propozoi përfshirjen e dy pikave shtesë në rendin e ditës: propozim-vendimin për miratimin e raportit të Komisionit për dëmet e shkaktuara nga fatkeqësia natyrore dhe raportin e Drejtorisë së Arsimit për përfundimin e vitit shkollor 2025/2026 dhe fillimin e vitit të ri shkollor 2026/2027.

Sipas të dhënave të prezantuara nga Komisioni për dëmet e shkaktuara nga fatkeqësia natyrore, dëmet e evidentuara vetëm në sektorin e bujqësisë në Komunën e Vitisë kapin vlerën prej mbi 1.2 milionë euro.

Një nga çështjet kryesore të trajtuara nga KPF-ja ishte edhe projektbuxheti për periudhën 2027–2029. Listën e projekteve të planifikuara për këtë periudhë e prezantoi drejtoresha e Financave dhe Zhvillimit Ekonomik, Milihate Ajeti.

Sipas prezantimit, vlera e përgjithshme e projekteve investive të planifikuara për vitet 2027–2029 arrin në 3 milionë e 142 mijë e 875 euro.

Në mbledhje u shqyrtua edhe kërkesa për vendosjen në shqyrtim publik të projektit për Hartat Zonale Komunale të Vitisë 2026–2034, të paraqitur nga drejtoresha e Urbanizmit, Planifikimit dhe Mbrojtjes së Mjedisit, Zyrafete Rama.

Anëtarët e KPF-së shqyrtuan gjithashtu propozimin për shfuqizimin e vendimit për kthimin e mjeteve buxhetore në kategorinë ekonomike të investimeve kapitale.

Të gjitha pikat e trajtuara u miratuan nga anëtarët e KPF-së dhe pritet të procedohen për shqyrtim në seancën e radhës të Kuvendit Komunal të Vitisë, e cila pritet të mbahet javën e ardhshme.

Gjatë mbledhjes u trajtuan edhe çështje të tjera të parapara në rendin e ditës, për të cilat anëtarët zhvilluan diskutime dhe dhanë rekomandimet përkatëse./rajonipress/