Haziri: Të zbardhet Dosja e luftës, Gjilani e ka të gatshme dosjen e krimeve

Gjilan – Lutfi Haziri ka kërkuar nga organet e hetuesisë që të merren seriozisht me krimet e luftës. Dosja e Gjilanit dhe krimet tjera të luftës të kryera në Anamoravë duhet të zbardhen njëherë e përgjithmonë thotë ai për rajonipress.

Lutfi Haziri u ka dhënë një mesazh organeve të Prokurorisë për të hetuar të gjitha krimet e kryera në Gjilan e Anamoravë. “Duhet të zbardhet Dosja e luftës. Gjilani tashmë e ka dosjen e plotë të krimeve të luftës dhe po ashtu edhe të dëmeve të luftës ndaj qytetarëve dhe ekonomisë familjare e shtetnore. Është koha e fundit që të fillon procesi i hetimeve ndaj atyre që kanë dosje kriminale. Na gëzoj lajmi i arrestimit të një krimineli për krime lufte në Zhegër, por kjo është e pamjaftueshme kundër dosjes së madhe që duhet të hetohet” u shpreh Haziri për rajonipress.

Haziri e ka falënderuar Qeverinë e Malit të Zi për këtë veprim ndaj krimeve në Zhegër. “Këtë shembull duhet ta përcjell Qeveria e Serbisë për ata që fshehën në Serbi, por edhe Kroatët që dyshohet që një numër i tyre me identitet të rrejshëm fshehën në Kroaci. Ne kemi evidenca po ashtu që një numër i kriminelëve janë në Evropë dhe Australi si azilkërkues. Qeveritë e këtyre vendeve duhet të kërkojnë informacione shtesë për ta, para se të aprovojnë azilin politik për ta” tha Haziri./rajonipress/