Shkolla “Nazim Hikmet” nga Doberçani nënshkruan marrëveshjen e binjakëzimit, me shkollën “Şehit Oğretmen Hasan Akan ilkokulu” nga Stambolli i Turqisë

Gjilan – Javën që lamë pas, shkolla “Nazim Hikmet” nga Dobërçani ka nënshkruar marrëveshjen për binjakëzim me shkollën “Şehit Oğretmen Hasan Akan ilkokulu” në Stamboll/ Turqi.

Përmes këtij binjakëzimi, shkolla mike e Turqisë do të ndihmojë shkollën “Nazim Hikmet” në Dobërçan, si në infrastrukturë, ashtu edhe në shkëmbimin e përvojave të cilat kanë për qëllim forcimin e lidhjeve reciproke dhe ngritjen e cilësisë në arsim.

Marrëveshja për binjakëzimin e shkollave është nënshkruar në mes të Koordinatorit për Sigurimin e Cilësisë në shkollën “Nazim Hikme” Dobërçan, Rexhep Arifi, i cili ishte i deleguar me këtë detyrë nga drejtori i shkollës, Fadil Shabani, si dhe drejtoreshës së shkollës “Şehit Oğretmen Hasan Akan ilkokulu”, Füsun Kubilay, e cila ofroi mbështetje të pa rezervë në realizimin e projekteve të përbashkëta ndërmjet dy shkollave në të ardhmen.

Në kuadër të bashkëpunimit me shtetin mik të Turqisë, shkollës “Nazim Hikmet” në Dobërçan, disa javë më parë i janë dhuruar tri tabela të mençura/smartboard nga Ministria e Arsimit e Turqisë, të cilat po e lehtësojnë tej mase realizimin e procesit mësimor si për nxënësit, ashtu edhe për mësimdhënësit./rajonipress/