Komuna e Vitisë nis realizimin e projektit për asfaltimin e 38 rrugëve të lagjeve

Viti – Në Sllatinë të Epërme të Komunës së Vitisë, sot, ka filluar realizimi i projektit për asfaltimin e rrugëve të lagjeve në këtë lokalitet si dhe lokalitete tjera të kësaj komune, ku planifikohet të asfaltohen 38 rrugë të lagjeve.

Kryetari i Komunës së Vitisë, Sokol Haliti, ka thënë se, sot, me fillimin e punëve në asfaltimin e rrugës “Saqip Hoxha”, në Sllatinë të Epërme, po fillojmë punimet në asfaltimin e rrugëve edhe në shumë lagje të këtij lokaliteti si dhe në fshatra tjera. “Gjatë këtij viti kemi planifikuar asfaltimin e 38 rrugëve të lagjeve në shumicën e fshatrave të komunës së Vitisë, projekte këto që financohen nga buxheti komunal. Por kësaj liste të rrugëve që do të asfaltohen nëpër lagje do t`i shtohen edhe shumë rrugë tjera, pasi në këtë iniciativë kemi edhe mbështetjen e institucioneve qendrore”, ka thënë Haliti.

Ai ka theksuar se Në Sllatinë të Epërme, pos asfaltimit të rrugëve të lagjeve, komuna gjatë këtij viti planifikon edhe përfundimin e plot të projektit për ujin e pijes, pastaj rregullimin të trotuarit në rrugët kryesore të fshatit, ndriçimin, ndërtimin e një parku si dhe asfaltimin e rrugës që lidhë Sllatinën e Epërme me Pozheranin. “Sllatina e Epërme gjatë gjithë kohës ka qenë kontribuuese e shumë proceseve nëpër të cilat ka kaluar vendi, prandaj edhe meriton një vëmendje të veçantë që banorëve të këtij lokaliteti t`i përmirësojmë jetën”, ka thënë Haliti.

Kurse, Ibush Sefedini, banorë i rrugës “Saqip Hoxha”, ka thënë se projekti për asfaltimin e rrugës në këtë lagje, ka qenë një domosdoshmëri pasi banorët që banojnë në këtë lagje e kishin të vështirë të qarkullonin në këtë rrugë, sidomos kur kishte të reshura atmosferike. “I jemi mirënjohës komunës për këtë projekt të cilin e kemi pritë gjatë, pasi me këtë projekt po bëhet një zgjidhje e cila do të përmirësoi dukshëm jetën e banorëve në këtë rrugë”, ka thënë Sefedini.

Ndersa Elbasan Ahmeti, anëtar i këshillit të fshatit Sllatinë, ka thënë se ky projekt dhe projektet tjera që planifikohen të realizohen në Sllatinë, kthejnë besimin e banorëve në institucionet komunale, pasi kemi qenë të anashkaluar. “E falënderoi kryetarin e komunës si dhe udhëheqjen komunale për këto projekte që kanë qenë kërkesa të kamotshme të banorëve të fshatit e më të cilat përmirësohet dukshëm jeta e banorëve në këtë lokalitet”, ka theksuar Ahmeti./rajonipress/