Ministri për Komunitete dhe Kthim, Dalibor Jevtic ka vizituar Vitinë

Viti – Ministri për Komunitete dhe Kthim Dalibor Jevtiç, ka qëndruar sot në komunën e Vitisë me që rast është interesuar të dijë më shumë rreth gjendjes së komuniteteve pakicë që jetojnë në komunën e Vitisë, ku përpos takimit me krerët komunal ai ka parë nga afër edhe projektet që janë realizuar në vendbanimet e banuara edhe me qytetarë të komunitetit serb, kroat e romë.

Ministri Jevtiç, fillimisht është pritur nga kryetari i komunës së Vitisë Sokol Haliti, i cili detalisht e ka njoftuar atë për mbështetjen dhe ndihmën që po u jepet komuniteteve në këtë komunë. “Në aspektin e përgjithshëm kemi realizuar një sërë projektesh për mirëqenien e qytetarëve,, ndërkohë që në aspektin individual jemi munduar që të ofrojmë ndihmë në bazë të mundësive krahas nevojave të shumta të qytetarëve”ka thënë Haliti.

Ai gjithashtu ka theksuar përkushtimin e institucioneve komunale për mirëqenien e jetës së qytetarëve dhe te komuniteteve, sidomos për realizimin e projekteve nëpër lokalitetet multietnike, ndërkohë që ka njoftuar ministrin Jevtic për zhvillimet e komunës në këtë drejtim.

Kurse ministri Jevtic , ndër të tjera ka theksuar gatishmërinë e Ministrisë për Komunitete dhe Kthim, që së bashku me Komunën e Vitisë të punojnë në zgjidhjen e problemeve të komuniteteve në këtë komunë, ndërkohë që ka përmendur edhe rëndësinë e krijimit të kushteve të përshtatshme për kthim.

Ai ka thënë se në bazë të informatave që posedon, çështja e kthimit të serbëve në Podgorc dhe Zhiti më shumë i takon aspektit të vetiniciativës së të zhvendosurve, pasi që problemi i multietnicitetit nuk qëndron, gjë që është dëshmi e stabilitetit të sigurisë në këtë komunë. Jevtiç ka premtuar edhe realizimin e një projekti të përbashkët që ka të bëjë me fshatin Binqë.

Pas takimit të zhvilluar në ambientet e komunës, Ministri Jevtiç së bashku me kryetarin Haliti kanë vizituar shëtitoren përgjatë rrugës Viti-Binqë, ndërkohë që më pas ai ka vazhduar me takime nëpër disa familje serbe në Binqë, për të vazhduar edhe me disa familje kroate në Letnicë./rajonipress/