Komuna e Vitisë nuk ka ndarë mjete për shpronësimin e tokave

Viti – zv. Kryetari i Komunës së Vitisë, Hasan Aliu tha se komuna nuk ka pasur alternativ tjetër për ndarjen e një lokacioni më të përshtatshëm dhe se për këtë vit nuk janë ndarë mjete financiare për shpronësimin e tokave duke bërë me dije se për momentin kjo është zgjidha më e mirë.

Komiteti për Politik dhe Financa i Komunës së Vitisë, sot në mbledhjen e pestë të rregullt, ka miratuar dhe proceduar për kuvend vendimet që kanë të bëjnë me caktimin e lokacionit për ndërtimin e objektit të zjarrfikësve, vendimin për hartimin e planit të veprimit lokal në mjedis, vendimin për rishikim e buxhetit komunal për vitin 2016 si dhe Raportin mbi vlerësimin e kushteve për dhënien e pëlqimit për leje të ndërtimit.

Në fillim të këtij takimi, Kryesuesi i Kuvendit Komunal të Vitisë, Naim Pira i njoftoj anëtarët e këtij komitetit se Ministria e Administrimit të Pushtetit Lokal ka konfirmuar ligjshmërinë e akteve të cilat janë miratuar në seancën e fundit nga Kuvendi Komunal i Vitisë.

Gjatë kësaj mbledhje me theks të veçantë është diskutuar për propozim vendimin për caktimin e lokacionit për ndërtimin e objekti të zjarrfikësve në Viti.

Sipas këtij propozim vendimi ky objekt pritet të ndërtohet në afërsi të stacionit të autobusëve në viti konkretisht në parcelën me nr. 2496-1 në sipërfaqe prej 5009 metra katror.

Mufail Halabaku, Drejtor i Drejtorisë për Kadastër, Pronësi dhe Gjeodezi bëri me dije se në mungesë të parcelave të tjera komuna e Vitisë e ka parë të arsyeshme që të propozoj këtë parcelë e cila gjendet në afërsi të stacionit të autobusëve në Viti.

Kurse zv. Kryetari i Komunës së Vitisë, Hasan Aliu tha se komuna nuk ka pasur alternativ tjetër për ndarjen e një lokacioni më të përshtatshëm dhe se për këtë vit nuk janë ndarë mjete financiare për shpronësimin e tokave duke bërë me dije se për momentin kjo është zgjidha më e mirë.

Ndërkaq Baki Nebiu, anëtar i KPF-së nga Lëvizja Vetëvendosje pasi që kërkoj sqarime shtesë mbi këtë ndarjen e kësaj parcele tha se gjetja e një lokacioni për ndërtimin e objektit të zjarrfikësve është i mirëseardhur.

Ndërkaq edhe anëtarë të tjerë të këtij komiteti e mirëpritën këtë propozim vendim, por disa nga ta dhanë mendimin se është mirë të gjendet një lokacion në përteri të qytetit të Vitisë.

Përndryshe Propozim Vendimi për caktimin e lokacionit për ndërtimin e objektit të zjarrfikësve është votuar me shumicë votash nga anëtarët e këtij komiteti ashtu siç janë votuar edhe të gjitha pikat e parapara për këtë rend dite të cilat do të shkojnë për procedim të mëtutjeshëm në Kuvendin Komunal të Vitisë./rajonipress/