Kuçi: Brenda dy javësh nënshkruhet marrëveshja për drejtësinë

Zëvendëskryeministri i Kosovës, Hajredin Kuçi ka konfirmuar se pas një ose dy javësh, pritet nënshkrimi i marrëveshjes mes Kosovës dhe Serbisë për fushën e drejtësisë, dhe kjo marrëveshja sipas tij është pjesa më e rëndë e marrëveshjes së arritur të 19 prillit. Ai ka pranuar se Gjykata Themelore do të jetë në Mitrovicë të Veriut dhe do të shtrihet në shtatë komuna me një njësi.

“Së shpejti do ta nënshkruajmë marrëveshjen për implementimin e drejtësisë, pra pranimi i ligjeve të Kosovës, dhe kjo nuk kërkon ndryshime ligjore”, ka thënë Kuçi për RTK, duke shtuar se grupet e punës do të vazhdojnë finalizimin e marrëveshjes.

Ai ka pranuar se Gjykata Themelore do të jetë në Mitrovicë dhe do të shtrihet në shtatë komuna me një njësi.

“Do të ketë një Gjykatë themelore dhe do kjo gjykatë do të ketë kompetenca edhe në Mitrovicën Jugore, Vushtrri dhe Skenderaj’, ka thënë Kuçi, citon infoglobi.

Kuçi ka shtuar se kemi ruajtur karakterin unik të drejtësisë, ku emërimin e gjyqtarëve dhe prokurorëve do ta bëjë presidentja e Kosovës, me ligjet e Kosovës.

Ai bëri të ditur se kjo Gjykatë nuk do të ketë karakter tjetër të veçantë të drejtësisë dhe, siç tha Kuçi, aty do të jenë të punësuar shqiptarë, serb dhe të komuniteteve tjera.

“Drejtësia nuk është e ndarë në baza etnike, pa marrë parasysh a janë të akuzuarit serb apo shqiptarë, pra nuk do të ketë ndarje”, tha Kuçi.

Edhe kryeministri serb Ivica Daic tha se në takimin e sotëm në Bruksel janë përafruar qëndrimet dhe se grupet e punës do të vazhdojnë finalizimin e marrëveshjes.

“Parimisht është arritur marrëveshja që në Mitrovicë të jetë një gjykatë kompetencat e të cilit do të shtrihen në shtatë komuna, ndërsa përbërja e njësive (të gjyqeve) duhet të jenë në përputhje me strukturën etnike “, ka thënë Dacic, njofton B92. /Telegrafi/