Zyrtari i kadastrit në Viti akuzohet për keqpërdorim të pozitës zyrtare

Gjilan – Prokuroria Themelore në Gjilan, Departamenti për krime të rënda ka ngritur aktakuzë kundër Fadil Hoxhës zyrtar në drejtorin e kadastrit në Viti për veprën penale keqpërdorimi i pozitës apo autoritetit zyrtar.

Edhe një zyrtar i Komunës së Vitisë po ndiqet penalisht nga Prokuroria Themelore e Gjilanit. Prokuroria Themelore në Gjilan ka ngritur aktakuzë kundër Fadil Hoxhës nga Sllatina e Poshtme e Vitisë, zyrtar në Drejtorinë e Kadastrit në Viti. Hoxha dyshohet për veprën penale “keqpërdorimi i pozitës apo autoritetit zyrtar”, raporton rajonipress.

Sipas aktakuzës që e ka ngritur prokurori Isuf Sadiku, Hoxha dyshohet se më 27 dhjetor 2012 në cilësinë e zyrtarit të drejtorisë së kadastrit ka nxjerrë aktvendim mbi të cilat më pastaj është bërë ndryshimi i destinacionit, nga toka bujqësore – kullosë në tokë ndërtimore, për sipërfaqen e përgjithshme prej 2.38, 70 ha, në emër të Ibrahim Ostorgllavës nga fshati Pozhoran dhe Mehmet Selmani nga fshati Komogllavë, pa i obliguar personat në fjalë që të paguajnë obligimet ndaj komunës, duke i shkaktuar dëmin material komunës së Vitisë në vlerë të 23,870.00 euro thuhet në aktakuzë.

Ndryshe i akuzuari Fadil Hoxha ka thënë në deklaratën e tij se ka qenë vetëm hartues i lejimit të incizimit të objektit në të dyja rastet dhe asgjë më tepër.

Ky gjykim pritet të fillojë së shpejti dhe janë paraparë të dëgjohen pesë dëshmitarë. /rajonipress/