Zyberaj: AKR së shpejti me imazh të ri në Gjilan

Gjilan – Largimi nga AKR-ja në LDK i këshilltares, Mizafere Ismajli nuk e ka shqetësuar këshilltarin politik të Behgjet Pacollit, Jetlir Zyberajn. Ai për rajonipress tha se njerëzit e tillë që bëjnë lëvizje të tilla kanë vetëdije të ulët dhe nuk ndihen të plotësuar si personalitete. AKR së shpejti do të ketë një imazh të ri në Gjilan tha ai.

Këshilltarja e Aleancës Kosova e Re në Kuvendin Komunal të Gjilanit, Mizafere Ismajli, ka kaluar në Grupin e këshilltarëve të Lidhjes Demokratike të Kosovës.

Ismajli ka thënë se ishte e pakënaqur me tretmanin jo të mirë që pati në AKR. Po kjo deklaratë dhe vet largimi i Ismajlit nuk po shihen as si pengesë e as si shqetësim në taborin e AKR-së.

Jetlir Zyberaj këshilltar politik i Behgjet Pcollit tha për rajonipress se AKR-ja në Gjilan është stabile, e organizuar dhe shumë shpejt pritet që ajo të ketë një imazh të ri. “Nuk ka krizë e as që mund të shkaktojë dikush një situatë të tillë. Ne jemi parti serioze me një strukturë të qëndrueshme e cila fatmirësisht nuk bazohet në individ” tha Zyberaj.

Zyberaj duke folur për largimin e Mizafere Ismajlit tha se njerëzit e tillë që bëjnë lëvizje të tilla kanë vetëdije të ulët dhe nuk ndihen të plotësuar si personalitete.”Nuk jemi fare të shqetësuar sepse të tillët që kanë bërë veprime të njëjta më herët, mund fare lehtë t`i shihni sot se ku kanë përfunduar” tha Zyberaj./rajonipress/