Gjilani humb Naser Ismail, njeriun e mikpritjes, sinqeritetit dhe traditës së mirë shqiptare

Gjilan – Naser Ismaili, i njohur nga të gjithë si Naser Turki, është ndarë nga jeta në moshën 64-vjeçare, duke lënë pas kujtime të shumta te familjarët, miqtë dhe të gjithë ata që patën rastin ta njohin.

Gjilani ka humbur një nga figurat e njohura të mikpritjes dhe gastronomisë tradicionale, një njeri që për vite me radhë e bëri restorantin e tij një vend ku ushqimi i mirë, bujaria dhe ngrohtësia njerëzore shkonin bashkë.

Naser Turki nuk ishte thjesht një emër i njohur për gjilanasit. Ai ishte simbol i mikpritjes së sinqertë, i respektit për mysafirin dhe i traditës shqiptare, ku secili që hynte në derë duhej të ndihej si në shtëpinë e vet.

Restoranti i tij ishte i njohur për cilësinë, ushqimin tradicional dhe atmosferën familjare. Për shumë qytetarë të Gjilanit, por edhe për mysafirët që vinin nga qytete të tjera, ndalesa te restoranti i Naserit ishte bërë pjesë e përvojës së tyre në këtë qytet.

Madje, ndër gjilanas është përcjellë shpesh edhe shprehja: “Nëse ke ardhur në Gjilan dhe nuk e ke frekuentuar restorantin e Naserit, ke gabuar rëndë!” Një fjali që shpreh më së miri vendin që ai kishte fituar në zemrat e njerëzve dhe respektin që gëzonte për mikpritjen e tij.

Por, përtej shijes së ushqimit dhe traditës së restorantit, Naser Turki do të kujtohet mbi të gjitha për anën e tij njerëzore. Sinqeriteti, afërsia me njerëzit dhe gatishmëria për të pritur e respektuar secilin ishin tipare që e karakterizonin. Ai dinte ta kthente një vizitë të zakonshme në një përvojë të ngrohtë, ku mysafiri largohej me përshtypje të mira dhe dëshirë për t’u kthyer sërish.

Lajmi për ndarjen e tij nga jeta është bërë i ditur nga familja Ismail, e cila, përmes një njoftimi mortor, ka shprehur dhimbjen për humbjen e babait të dashur, duke bërë të ditur se për datën dhe orën e varrimit do të njoftojë më vonë.

Naser Ismaili largohet fizikisht, por kujtimi për të do të mbetet i gjallë në mesin e atyre që e njohën, në bisedat e miqve, në kujtimet e mysafirëve dhe në historinë e mikpritjes gjilanase.

Ngushëllime familjes Ismail, miqve dhe të gjithë atyre që e njohën Naser Turkën.

U prehtë në paqe!