‘Zajednica’ e mban peng edhe ‘Trepçën’

Qeveria e Serbisë ushtron ndikimin e saj në pasuritë e Kosovës. Një vit pas protestave, fati i ndërmarrjes në udhëkryq

“Tani gjërat duken të ndërlidhura ndërmjet “Zajednicës”, “Trepçës” “Brezovicës” dhe disa aspekteve të tjera ekonomike. Ashtu siç e ka bllokuar ose kushtëzuar privatizimin e “Brezovicës”, Serbia do ta shtojë ndikimin edhe rreth punëve të ‘Trepçës’, madje tani është e pozicionuar më mirë, pasi ka në dispozicion edhe një subjekt për t’i përfaqësuar dhe realizuar interesat e saja në “Trepçë”, pra “Zajednicën”, vlerëson analisti Isa Mulaj

Para një viti, pati protesta për shpëtimin e ‘Trepçës’, por tash një vit pas, ende nuk dihet se çfarë fati do të ketë kombinati metalurgjik. Deputetë nga radhët e opozitës dhe ekspertë të ekonomisë janë me dyshime se Qeveria ‘afa-Thaçi’, por edhe Kuvendi i Kosovës qëllimisht janë duke e prolonguar miratimin e Projektligjit për ‘Trepçën’.

Sipas tyre, kjo zvarritje do të ndodhë deri në miratimin e Statutit dhe akteve të tjera nënligjore, si dhe dekretimin nga ana e Qeverisë të Asociacionit të komunave serbe. Deputeti i opozitës, Lahi Brahimaj (AAK), thotë se koalicioni i tashëm nuk i ka votat e mjaftueshme për ta miratuar këtë projektligj, sepse votimi për miratimin e këtij projektligji është kushtëzuar nga Lista Serbe me miratimin e statutit dhe më pas edhe dekretimin e Asociacionit apo Bashkësisë së komunave me shumicë serbe në Kosovë (‘Zajednica’). Bazuar në prononcimet e mëhershme të zëdhënësit dhe zyrtarëve të tjerë të lartë të Qeverisë së Kosovës, strategjia, por edhe Projektligji për ‘Trepçën’ do të miratohen në vitin 2016./kosova sot/