Xhaka, rezervist edhe ndaj Bournemouthit

Trajneri i Sunderlandit, Regis Le Bris po vazhdon ta monitorojë gjendjen fizike të Granit Xhakës dhe nuk është i sigurtë nëse kapiteni do të jetë startues në duelin kundër Bournemouthit.

Xhaka vikendin e shkuar u rikthye nga lëndimi, duke u aktivizuar në 20 minutat e fundit kundër Fulhamit, ndeshje kjo që Sunderlandi e humbi 3:1.

Kështu që aktivizimi i tij prej minutës së parë në duelin e së shtunës mbetet në dyshim dhe do të vendoset në momentet e fundit.

Te Sunderlandi i janë gëzuar kthimit të Xhakës, i cili sipas trajnerit ka motivuar gjithë ekipin për shkak se është lider i skuadrës.

Xhaka i mungoi Sunderlandit në pesë ndeshje në të gjitha garat, ndërsa në 23 paraqitje deri më tani në Premier League, ai ka realizuar 1 gol dhe ka bërë 5 asistime.