Vrasje në tentativë në Gjilan, shtatë persona të përfshirë në përleshje me thika, pesë në ndalim

Gjilan – Një rast i rëndë i cilësuar si “vrasje në tentativë” është raportuar mbrëmjen e së premtes në rrugën “Lulishtja” në Gjilan.

Sipas informacionit zyrtar, më 28 shkurt 2026 rreth orës 22:40, shtatë persona të dyshuar, meshkuj kosovarë, janë përfshirë në një përleshje fizike mes vete, gjatë së cilës dyshohet se janë përdorur edhe mjete të mprehta, thika. Si pasojë e konfliktit, të gjithë të përfshirët kanë pësuar lëndime trupore.

Pas marrjes së ndihmës mjekësore në Spitalin Rajonal të Gjilanit, pesë nga të lënduarit janë liruar, ndërsa dy persona, për shkak të lëndimeve më të rënda, janë transferuar për trajtim të mëtejmë në Qendra Klinike Universitare e Kosovës në Prishtinë.

Me vendim të prokurorit të shtetit, pesë të dyshuar janë arrestuar dhe, pas intervistimit nga organet e rendit, janë dërguar në mbajtje. Rasti po hetohet nga autoritetet kompetente, ndërsa motivet e përleshjes mbeten ende objekt i hetimeve./rajonipress/