Vrasje e rëndë në tentativë në Gjilan, i mituri dyshohet se goditi me sëpatë babanë e tij

Gjilan – Një rast i rëndë i vrasjes në tentativë ka tronditur qytetin e Gjilanit, pasi një person është dërguar me urgjencë në spital si pasojë e lëndimeve të rënda të shkaktuara nga goditja me sëpatë njoftoi policia e Kosovës.

Sipas informacioneve të marra nga Spitali Rajonal, viktima, mashkull kosovar, është sjellë në gjendje të rëndë shëndetësore pasi dyshohet se është sulmuar me sëpatë nga djali i tij i mitur. Pas ekzaminimeve mjekësore, për shkak të gjendjes serioze, ai është transportuar në Qendrën Klinike Universitare të Kosovës (QKUK) për trajtim të mëtejmë.

Në vendin e ngjarjes kanë dalë menjëherë njësitet relevante policore, të cilat kanë nisur hetimet lidhur me rrethanat e rastit. Po ashtu, në vendin e ngjarjes ka qenë i pranishëm edhe përfaqësuesi i Qendrës për Punë Sociale (QPS), i cili është marrë me trajtimin e personit të mitur të dyshuar.

Sipas burimeve zyrtare, punëtori social ka realizuar vlerësimin fillestar të fëmijës, ku është konstatuar nevoja emergjente për strehimin e tij, për shkak të gjendjes së rënduar psikologjike dhe situatës traumatike të shkaktuar nga ngjarja.

Autoritetet kompetente kanë bërë të ditur se rasti është duke u hetuar dhe se do të ndërmerren të gjitha veprimet e nevojshme procedurale në përputhje me ligjin, duke pasur parasysh ndjeshmërinë e rastit dhe përfshirjen e një të mituri./rajonipress/