Vokrri: Ka dyshime për kurdisje, s’ka fakte

Nga të katër anët po flitet për kurdisje, megjithatë të gjitha mbeten vetëm si dyshime. Edhe kryetari i Federatës së Futbollit të Kosovës, Fadil Vokrri, ka dyshimet e tij, mirëpo ai thotë se nuk ka fakte e argumente.

Në një intervistë për gazetën Tribuna, Vokrri ka theksuar se mungojnë faktet për të zbuluar dhe dënuar aktorët e një kurdisje, teksa u bënë thirrje të gjithëve që kanë fakte t’i dorëzojnë ato në Federatë. Vokrri propozon krijimin e një Komisioni të Etikës, që do të përbëhej edhe nga njerëz jashtë Federatës e i cili do të merrej me çështje të tilla.

Legjenda e futbollit kosovar, foli edhe për rrugën e ndërkombëtarizimit të futbollit, duke dhënë edhe përparësitë pas marrëveshjes Kosovë-Serbi në Bruksel.

Për Vokrrin, muaji maj mund të sjell miqësoret për të gjitha grupmoshat, duke mos përjashtuar edhe mundësinë e një ndeshje kundër Përfaqësueses së Argjentinës. Kreu i FFK-së bënë të ditur se një ndeshje e tillë do të mund të zhvillohej në Kankun të Meksikës nën organizmin e guvernatorit të këtij regjioni, Julian Ricalde Magana (Tribuna).