Vizitë e frytshme në Berlin e “Yjeve të Kosovës”
Shoqata “Yjet e Kosovës” në Emmendigen vlerësohet si një shembull veçanërisht aktiv dhe i suksesshëm i punës për integrim.
Në pritjen për nderë të përvjetorit të gjashtë të pavarësisë së Kosovës, në Berlin, ka marrë pjesë edhe një delegacion i shoqatës “Yjet e Kosovës” (Die SterneKosovas) nga Emmendigeni. Me ndërmjetësimin e deputetit nacional të CDU-së nga regjioni, Peter Weiss, në manifestimin e mbajtur në kryeqytet, të thirrur nga ambasadori Skender Xhakaliu, kanë marrë pjesë edhe Tahir Shabani, Zyhraje Krasniqi dhe Brahim Shabani nga shoqata e përmendur.
Ambasadori me këtë rast ka vlerësuar lartë edhe angazhimin e madh të kosovarëve që jetojnë në Gjermani, të cilët atdheun e tyre e kanë mbështetur fuqishëm financiarisht.
Shoqata “Yjet e Kosovës” në Emmendigen vlerësohet si një shembull veçanërisht aktiv dhe i suksesshëm i punës për integrim. Në një intervistë për televizionin kosovar që dha deputeti Peter Weiss në kuadrin e pritjes, bëri fjalë lidhur me bashkëpunimin me shoqatën nga Emmendingeni, shkruan “Südkurier”.
Pritja në ambasadë, për delegacionin e vogël të “Yjeve të Kosovës” ishte rast i mirë për takim dhe bashkëbisedim me një numër të madh parlamentarësh, gazetarësh dhe diplomatësh.
Duke përfituar nga vizita në Berlin, delegacioni ka pasur po ashtu rastin të ndjekë punimet e Parlamentit (Bundestagut) Gjerman dhe të bashkëbisedojë me deputetë të këtij parlamenti.
Mysafirët nga Emmendingeni kanë vizituar edhe selinë qendrore të CDU-së, pastaj Ministrinë e Punës, përkujtimoren e Murit të Berlinit si dhe një ekspozitë në monumentin e Holokaustit./albinfo.ch/