Dhjetëra mijëra punëtorë vlerësohet se kanë lëshuar Kosovën gjatë këtij viti derisa një numër i madh i qytetarëve po presin liberalizimin e vizave për t’u larguar nga vendi.

Kështu të paktën thonë nga sindikata e pavarur e sektorit privat, nga e cila shprehin se arsyet që po i shtynë punëtorët për të lëshuar Kosovën janë pagat e ulëta e kushtet jo të mira të punës.

“Për vitin 2023 e kemi një statistikë e cila nuk mund të jetë shumë e saktë, por janë diku rreth 70 mijë punëtorë. Mendoj që në janar dhe në periudhën e ardhshme punëtorët do të shkojnë dhe do të shikojnë kontraktimin e marrëveshjeve me kompani private në Evropë në Gjermani”, ka deklaruar për RTK-në Jusuf Azemi -kryetar i Sindikatës së Pavarur të Sektorit privat të Kosovës.

Nga Instituti Riinvest kanë thënë se rreth njëmijë biznese në Kosovë kanë njoftuar se mbi tridhjetë e dy për qind e punëtorëve të tyre ka gjasa të emigrojnë gjatë vitit 2024.

Sipas këtij instituti, kosovarët deri tani kanë arritur më së shumti të marrin leje të punës jashtë vendit në sektorin e ndërtimit, akomodimit, shërbimeve administrative, prodhimit e tregtisë me shumicë e pakicë.

Edhe përfaqësues të odave e sindikatave të sektorit publik kanë paralajmëruar se një numër i madh i punëtorëve tashmë kanë nisur procedurat për t’u larguar nga vendi.

“Nuk shohin perspektivë të mbesin këtu si për veti, po edhe për familje. Dimë fare mirë se tash edhe Gjermania e ka lehtësuar bashkimin familjar dhe do të thotë kjo se gjendja e përgjithshme në Kosovë vërtet ndikon edhe te këta”, ka deklaruar Pleurat Sejdiu – kryetar i Odës së Mjekëve të Kosovës.

“Kjo ngritje kaq e ulët e pagës mund t’i shtojë te punëtorët e arsimit idetë që ata në një mënyrë apo tjetër të ikin nga sistemi arsimor, siç po ndodh fatkeqësisht edhe në Policinë e Kosovës dhe sektorë tjerë”, ka deklaruar Rrahman Jasharaj nga SBASHK.

Sipas Riinvestit, bizneset në Kosovë po hasin më shumë vështirësi për të mbuluar pozitat e punës për profesionistë, menaxherë e punëtorë të zejtarisë dhe tregtive të ngjashme.

Në krahasim me shtetet e tjera të rajonit, Kosova nga 2016 deri në vitin 2022 ka prirë sa i përket numrit të qytetarëve që kanë emigruar.

“