Vdes i riu shqiptar në aksident në Itali

Një i ri shqiptar ka humbur jetën në Itali si pasojë e një aksidenti automobilistik. Autori, një shtetas italian u dorëzua një ditë më pas në polici.

Klajdi Kasa 23 vjeç, djali i plagosur në aksidentin rrugor në Brescia ka ndërruar jetë në spital. Një bergamask dorëzohet te karabinierët e Grumello del Monte-s dhe deklaron se e ka qenë ai në timon të makinës që ka shtypur djalin, por pohon se nuk e dha ndihmën e shpejtë në kohë sepse “ishte në gjendje konfuzionale”, raporton BW.

Sot në mëngjes ndërroi jetë në spital të Brescias, Klajdi Kasa, 23 vjeçari që u shtyp me makinë ndërsa kthehej në shtëpi nga puna. I riu u gjet buzë rruge pa ndjenja në orën 2.30 duke gdhirë e diel, 28 tetor, nga kalimtarë të rastit.

Me të mbërritur në spitalin civil të Brescias u kuptua se gjendja e tij ishte shumë e rëndë: nuk vlejti për t’i shpëtuar jetën as ndërhyrja kirurgjikale për reduktimin e plagëve të brendshme. “Nuk na e priste mendja kurrë që dita e parë e punës të kthehej në një tragjedi të tillë” thotë i vëllai.

Shoferi që shkaktoi aksidentin fillimisht nuk ka ndaluar, as për të parë në ç’gjendje e kishte katandisur djalin. Vetëm të dielën, rreth orës 18.30, është dorëzuar në stacionin e karabinierëve të Grumello del Monte-s, brenda 24 orëve nga aksidenti duke shmangur kështu arrestimin. Sipas informacioneve të para, personi që ka shtypur Kasën është një i ri nga Bergamo.

Siç shprehen zakonisht të ashtuquajturit ‘piratë të rrugës’ edhe djali nga Bergamo u tha karabinierëve se në çastin e aksidentit ishte në gjendje konfuzioni ndaj edhe nuk ndaloi të ndihmonte të riun shqiptar.