Ultra të shkurtëra
Poezi të përzgjedhura enkas për rajonipress nga Sabit Rrustemi.
(1)
pak veta e pranojnë humbjen si burrat
qindra burrecë zvarriten pas fituesit
për t’ ia lëpirë dhe këpucët
(4 nëntor 2013 )
(2)
sa të rrjedh ujë nëpër Bunë
sht(r)atit tënd
do t’ jem
unë
( 4 nëntor 2013 )
(3)
nëse s’ mund t ‘ ia zgjasësh dorën
të rrëzuarit
kurseje sëpaku nga shkelmat
( 4 nëntor 2013 )
(4)
puthadorët puthisen si munden
vetëm a po kanë ku
për t’i vënë buzët
(4 nëntor 2013 )
(5)
para portës së fituesit
vërshojnë uruesit
te humbësi mungojnë dhe vartësit
(4 nëntor 2013 )
6.
kushdo që sheh ëndërr
në ditën me diell sy hapur
natëm
nëpër to
edhe ma keq ka për t’u përplasur
( 7 nëntor 2013 )
7.
sa herë fshihen pas veshëve mizat
fjalët e urta përpushen
hapësirave të kthejllta të mendjeve rishfaqen
shushullimat heshtin
( 8 nëntor 2013 )
8.
askush s’ është i humbur
përderisa është pjesë e kësaj dite
as më të dashurit që i kemi
lutuni që të gjallët të bëhen më të mirë
lutuni për paqen e përbotshme të shpirtërave
që shndrisin kujtesave tona
lutuni edhe për veten
se çdo ditë e re është dhe një fat i ri
dhe një mëkat po u shmangëm nga e ëmblja dashuri
( 10 Nëntor 2013 )
( 9 )
shushullon dhe sonte
shushullima e një nate më parë
lisat humbin gjethet
gjethet stinën
e humbësit rrugën brenda oborrit
drejt nesh për midis natës
ditë e re hapëron dhe Ti
(11 nëntor 2013 )
10.
ti nuk ikën nga unë pse ndërrohen stinët
as pse për një cast heshtim para fjalëve
trupit tim je duke i përpushur lulet bimët
për r’ ju dhënë frymë e aromë të gjallëve
ti je në mua edhe kur nuk të shoh
e pas të bie të kërkoj qiellit pa kufi
në çast më rishfaqesh e më ngroh
më mbushë jetë me tënden dashuri
( 13 nëntor 2013 )
( 11 )
vjellësi nuk zgjedh vend
as moment
vjell pa rend
harron që vjellja as dje as sot
nuk është trend
në t’ vjellat e veta sharron me gjithë mend
( 17 nëntor 2013 )
12.
e shkurtër është kjo e përkohshme
për ta thithur shpejt
mos nxito për ta nxënë atë çast të ftohtë
që djeg zemrën ma shumë se buzët
e nuk shkrinë as nga lotët
e përjetshmja përjetohet përmes të përkohshmes
( 21 nëntor 2013 )
13.
rigon vjeshta nëpër etjet e mia
rigon e përpushë burime të vjetra
sa shuhet një zjarr
dhjetëra tjerë zjarrmojnë nëpër dej
as në dielën e lutjeve nuk të gjej
e ti je këtu diku thellë
aty ku një dashuri të pashkulur kam mbjellë
kjo ndjenjë përherë më kthjellë
( 24 nëntor 2013 )
14.
shtrij krahët
hap zemrën këtë portë shpirti
sytë i nis ladrim kah ti
e unë
si Gur i Zemrës Sate
nuk lëviz vendi pa më prekur Ti
( 24 nëntor 2013 )
15.
u lëshua perdja
dritarja u nxi
rrena e mbylli gojën
sa për sy e faqe
mesnata ngriu heshtjen
njeriu u kthye në sy e veshë
duke pritur një tjetër ditë
( 30 nëntor 2013 )
16.
Në Heshtjen e kësaj dite
Ti po fle
Fli e mos përpush
Një ëndërr e mirë
Posa i u shfaq synit
Një zgjim i ri po e thërret
( 30 nëntor 2013 )
17.
humbësin nuk e ëmbëlson as mjalta
ekstazën e fituesit shpejt e bartë era
ruana zot nga pritjet e mëdhaja
( 4 dhjetor 2013 )
18.
Ti lehtësues i jetës sime
Më kurse nga mëria e Humbësit
Dhe nga barra e Fituesit
Më liro
Çka shkon e nuk kthehet s’ e dua më
( 6 dhjetor 2013 )
19.
Urimet presin në radhë
Për t’u zbrazur para Fituesit
Kujdestarët e pritësve fërkojnë duart
Zgërdhijnë dhëmbët
Pas shpine vjellin përgojimet
Trotuari rrudhet
Shkallët as me thembra preken
Tej rrugës
Nën hije pallatesh
Rreshti i pambarim i ankuesve gatitet
( 9 dhjetor 2013 )
20.
Aq përmallshëm e prita
Sa nuk e pashë fare kur erdhi
Tash e kërkoj
Nëpër krejt ditët e jetës e nuk e gjej
E përdala Natë
Nga ëndrrat ma fshehë
Në një skutë të shpirtit ajo flokët shkrehë
( 9 dhjetor 2013 )
21.
Ngeli mes meje e vetes diku
Thërmijat e nji dashurie
Tuj i shiju
Veten time përditë ngapak
Në thërmia kam me ja thërmu
( 9 dhjetor 2013 )
22.
secili e kemi nga një dritë shpirti
thellësive të qenies
për ta ecur udhën që nuk e shohim
drejt ëndrrës që n’ bisht të syrit e fshehim
ajo është aty
edhe kur harrojmë për ta ndezur
edhe kur pandehim se e kemi humbur
vetëm cilin damar duhet prekur
s’ po kemi kohë për ta mësuar
( 10 dhjetor 2013 )
23.
Fara e mirë e zemrës
Mbin
kur e harroj
S’mblidhet
kur më duhet
Çuditërisht shfaqet
kur nuk e pres
( 10 dhjetor 2013 )
24.
I marrim kodrat n’ sy
Sa nuk na kanë lënë këmbët
E gjunjtë ende ruajnë yndyrë
Rrafshi s’ kalohet më n’ thembra
Dramat sall kilogramë shtuan
Dhe udhët na i nxinë
( 12 dhjetor 2013 )
25.
Krrokasin KorbëZinjtë eterit nën retë e zeza
Krrokamën e moçme nëpër breza breza
Krrokama e tyre
Krrokohet gjuhëve të përdala
Për lartësitë e paarrira me mendje të çala
Këto krriçka komponime të trishta
Katandisen kanaleve të pista
Falë erës që tutje i bartë
Shuhen dhe këto krrokëdhima
Shpirti Ynë i paqtë
( 12 – 13 dhjetor 2013 )
26.
Asaj nuk i mungon asgjë
nga krejt ato që ëndërrohen
ndjehen
përveç Prekjes
Askush nuk i mungon asaj
në këtë çast
përveç Meje
Me krejt këtë pasuri
e ngrirë mbetet si ky mëngjes
derisa të shfaqem Unë
( 16 dhjetor 2013 )
27.
ajo që mungon
asnjëherë nuk ke qenë ti
vetëm dita që ende s’ ka trokitur
( 19 dhjetor 2013 )
28.
lavatriqet i lajnë e i thajnë rrobat
madje dhe enët gotat lugët
po
jo dhe pjesët që i mbulojnë ato rroba
jo dhe zorrët që mbushen nga lugët gotat enët
njeriu nuk la gjë pa shpikur thuaja
pos një makineje që lanë e shpërlanë
mëkatet tona të pafalshme
( 19 dhjetor 2013 )
29.
kush pendohet nga ajo që e ka dashur
zemrën të qetë më s’ ka për ta pasur
dhe vetëvetja një jetë ka për ta tallur
( 19 dhjetor 2013 )
30.
kuajve me bishtin mbi shpinë
mbathtari le t’ ju vejë mbrapa
se mbesin pa të mbathura
( 24 dhjetor 2013 )
31.
ah (P) engu
një Luks pa Orar
zorrët shpesh i ka trazuar
prej të vjellave
sa bima është tharë
ah
(P) engun
si nuk e paskëshim harruar
( 24 dhjetor 2013 )
32.
qiellin e kësaj nate
këtë mjegull të përhirtë
vetminë e bardhë mbi Çepur
vetëm vështrimi yt e dëbon
se si hapëron udhëve të padukshme
e më pushton
ai vështrim i syrit tend
( 24 dhjetor 2013 )
33.
,,,,,,,,,,,,,,,,,,,,,,,,,,,,,
,,,,,,,,,,,,,,,,,,,,,,,,,,,,,
,,,,,,,,,,,,,,,,,,,,,,,,,,,,,
,,,,,,,,,,,,,,,,,,,,,,,,,,,,,
asaj që më drithëron
dhe poezisë që më çliron
nuk i vë pike
( 24 dhjetor 2013 )
34.
mbi zjarrin e mbetur të natës
u derdh lënda e parë
për ngrohje
shtrojsat
të thara në pritje
ndizen si eshkë
t’ njomave të çara
që presin në radhë
faqet i u nxihen prej flakës
( 25 dhjetor 2013 )
35.
uh
sa të mirë shtruesit
për ulëse
sëmundje ngjitëse bëhen
më vonë
ruaji zot prej m’syshi
mungesa e (f) emrave
pa sy na la
( 25 dhjetor 2013 )
36.
ti nuk je aty ku të dua
aty ku gurgulloj
e jam sall krua
për buzët tua
etja ende s’u shua
përherë do ta përsëris
vetja jote s’ je pa mua
( 25 dhjetor 2013 )