UEFA “nxjerr” 11-shen e Shqipërisë për Evropian

Saktësisht dhjetë muaj para se të nisë “Euro 2016”, UEFA ka publikuar analizën e re lidhur me Kampionatin evropian të futbollit që mbahet në Francë. UEFA të enjten ka paraqitur përbërjet startuese të mundshme për EURO 2016, të të gjitha përfaqësueseve pjesëmarrëse.

Shorti për “Euro 2016” tërhiqet të shtunën, ndërsa kampionati mbahet prej 10 qershorit deri më 10 korrik të vitit të ardhshëm, shkruan sot Koha Ditore. Për herë të parë pjesë e evropianit është edhe Kombëtarja e Shqipërisë që bën pjesë në vazon e katërt për shortin e së shtunës.

Për Shqipërinë, UEFA ka parashikuar një përbërje të pritur. Portën ia ka besuar Etrit Berishës që ishte i pazëvendësueshëm në eliminatore. Para tij në mbrojtje i ka vendosur Elseid Hysajn në krahun e djathtë, Lorik Canën e Mërgim Mavrajn në qendër dhe Ansi Agollin në krahun e majtë të mbrojtjes.

UEFA ka parashikuar se vendosja në fushë e Shqipërisë në Francë do të jetë në sistemin 4-2-3-1. Para mbrojtjes, si mesfushor defansiv i ka parashikuar Taulant Xhakën e Burim Kukelin, ndërsa para tij në vijën ofensive të mesfushës Konfederata evropiane i ka vendosur Amir Abrashin në mes, Odise Roshin në krahun e djathtë dhe Ermir Lenjanin në të majtë. Si sulmues tipik në formacionin e Shqipërisë është parashikuar Sokol Çikalleshi.

http://koha.net/?id=6&l=88468