Ecohigjiena

KPF e Vitisë shqyrton vendimet për zhvillimin komunal, emërtimin e teatrit dhe mbështetjen e strehimores “Liria”

KPF e Vitisë shqyrton vendimet për zhvillimin komunal, emërtimin e teatrit dhe mbështetjen e strehimores “Liria”

Viti – Komiteti për Politikë dhe Financa i Kuvendit Komunal të Vitisë ka mbajtur mbledhjen e dhjetë të rregullt, në të cilën janë trajtuar një sërë çështjesh me rëndësi për qeverisjen lokale, planifikimin komunal, sigurinë në bashkësi dhe shërbimet sociale. Propozimet e paraqitura morën mbështetjen e anëtarëve të Komitetit dhe u rekomanduan për shqyrtim të mëtejmë në Kuvendin Komunal.

Nën drejtimin e kryesuesit të Kuvendit Komunal të Vitisë, Bekim Azizi, është mbajtur mbledhja e dhjetë e rregullt e Komitetit për Politikë dhe Financa (KPF), ku në fokus të diskutimeve ishin disa vendime që prekin drejtpërdrejt funksionimin institucional dhe zhvillimin e komunës.

Pas miratimit të procesverbalit nga mbledhja e kaluar, anëtarët e Komitetit kanë shqyrtuar propozime që përfshijnë fusha të ndryshme të administrimit lokal, nga infrastruktura dhe planifikimi hapësinor, deri te çështjet pronësore dhe mbështetja e shërbimeve sociale.

Hidromorava

Ndër çështjet e trajtuara ishte propozim-vendimi për emërtimin e sallës së teatrit në Viti me emrin “Jakup Jahiri”, një propozim që lidhet me nderimin dhe ruajtjen e kujtesës lokale. Po ashtu, u shqyrtua shpallja zonë me interes të përgjithshëm publik e një paluajtshmërie private, të evidentuar në emër të Afrim (Latif) Zeneli.

Vëmendje iu kushtua edhe nevojave infrastrukturore dhe hapësinore, përfshirë përcaktimin e lokacionit për varrezat në zonën kadastrale të Kabashit, si dhe propozimit për heqjen e kalldrëmit ekzistues në rrugën e UÇK-së dhe shtrimin e saj me asfalt.

Në kuadër të planifikimit institucional, Komiteti shqyrtoi edhe Planin e Punës së Kuvendit Komunal të Vitisë për vitin 2027, si dhe ndryshimin dhe plotësimin e vendimit për formimin e Këshillit Komunal për Siguri në Bashkësi.

Një tjetër çështje e rëndësishme ishte propozimi për shfuqizimin e vendimit të vitit 2006, që lidhet me bartjen e së drejtës së shfrytëzimit të paluajtshmërisë, tokë në pronësi shoqërore të OP “Agromorava” në Viti, te Kryqi i Kuq Komunal.

Bashkëpunimi ndërkomunal për mbrojtjen e grave dhe fëmijëve

Një ndër pikat me rëndësi të veçantë sociale ishte shqyrtimi i Memorandumit të Mirëkuptimit ndërmjet komunave Viti, Gjilan dhe Kamenicë, për mbulimin e pjesshëm të shpenzimeve të strehimores – Qendrës për Mbrojtjen e Grave dhe Fëmijëve “Liria” në Gjilan, për periudhën trevjeçare 2027–2029.

Ky bashkëpunim synon të kontribuojë në vazhdimësinë e funksionimit të një shërbimi të rëndësishëm për mbrojtjen dhe strehimin e grave dhe fëmijëve që përballen me dhunë dhe situata të rënda sociale.

Në rend dite ishte edhe rishqyrtimi i ligjshmërisë së vendimit për vënien në diskutim publik të Projekt-Hartës Zonale Komunale të Vitisë 2026–2034, dokument kyç për orientimin e zhvillimit hapësinor të komunës në vitet e ardhshme.

Pas diskutimeve për çështjet e parapara, propozimet që iu nënshtruan votimit morën mbështetjen e anëtarëve të Komitetit dhe u rekomanduan për procedim të mëtejmë në Kuvendin Komunal të Vitisë, ku do të vazhdojnë trajtimin sipas procedurave institucionale.

Mbledhja e dhjetë e KPF-së shënon një tjetër etapë të shqyrtimit të vendimeve që lidhen me prioritetet lokale të Vitisë, duke përfshirë planifikimin komunal, infrastrukturën, sigurinë dhe përgjegjësinë sociale të institucioneve ndaj qytetarëve./rajonipress/

Privatësia

Faqja jonë e internetit përdorë cookies. Ato janë skedar të vegjël që ndërveprojnë me pajisjen tuaj dhe kjo bëhet në mënyrë që ne t'ju ofrojmë përvojën më të mirë të mundshme gjatë përdorimit të faqes sonë.

Për të u informuar rreth politikave tona të privatësisë, ju lutem vizitoni faqen privatësia.

Cookiet e domosdoshëm

Cookiet e nevojshëm duhet të aktivizohet në çdo kohë në mënyrë që ne të mund të ruajmë preferencat tuaja për preferencat e cookies.

Cookies të palëve të treta

Kjo faqe interneti përdorë Google Analytics për të mbledhur informacione anonime si numri i vizitorëve në sajt dhe shfletimi i faqeve.

Mbajtja e aktivizuar e këtij cookie, na ndihmon neve të përmirësojmë faqen tonë në internet.