“Thimi Mitko” shënon festën e Abetares

Gjilan – Shkolla fillore “Thimi Mitko” ka shënuar sot festën e abetares, ku kanë marrë pjesë të gjithë nxënësit e klasës së parë të kësaj shkolle. Loja dhe vallëzimi ishin përsëri ato që fëmijët kanë shfaqur para prindërve dhe qytetarëve që ishin mbledhur para teatrit, për të kremtuar këtë festë.

Me këtë rast zv.drejtoresha Florina Qamili, pasi u ka uruar nxënësve të klasës së parë për këtë hap të rëndësishëm e të domosdoshëm të arritur në dituri, atyre u ka thënë se rrugët e botës për ta tashmë janë hapur me përfundimin e abetares dhe mësimit të shkronjave, të cilat janë elementi bazë i proceseve në vazhdim. Ky sukses i sotëm është bërë falë një përkushtimi të vazhdueshëm të nxënësve, mësimdhënësve dhe prindërve, për një mësim elementar.

Qamili uroi nxënësit që edhe më me ngulm të punojnë në arritjet e tyre shkollore, shkencore dhe intelektuale. “Ju duhet që tash e tutje edhe më fuqishëm të punoni e të mësoni, sepse ju do të jeni gjenerata e cila do të udhëhiqni me vendin, e ajo udhëheqje gjithsesi që do të jetë më e mirë se tani”, potencoi ajo ndër të tjera .

Ndryshe në këtë aktivitet të mbajtur para teatrit të qytetit kanë marrë pjesë nxënësit e klasave të para të sh.f. “Thimi Mitko”, prind si dhe shumë qytetarë të rastit. /rajonipress/