Thaçi: Pagat rritën nga muaji prill, FSK bëhet FAK

Kryeministri i Kosovës Hashim Thaçi, në mbledhjen e Qeverisë të së mërkurës ka marrë vendim për rritjen e pagave për të gjithë punonjësit e sektorit publik në Kosovës.

Ai ka kërkuar nga Ministri i Financave, Besim Beçaj, që vendimin për këtë ta përgatis dhe të fillojë ta ekzekutojë prej muajit prill.

Në këtë muaj pritet të nisë fushata për zgjedhjet parlamentare në Kosovë, për të cilat partitë kanë rënë dakord që të mbahen më së largu në qershor.

Në mbledhjen e Qeverisë së Kosovës, gjithashtu është shqyrtuar dhe miratuar projektligji për Arsimin e Lartë në Republikën e Kosovës. Ministri i Arsimit, Ramë Buja, ka prezantuar ndryshimet në këtë ligj për të cilin ka thënë se nuk do të ketë kosto shtesë.

Kryeministri Thaçi ka treguar gjithashtu se Projektligji për Veteranët e UÇK-së është proceduar në Kuvendin e Kosovës, ndërkaq ka ripërsëritur se është çështje javësh apo muajsh kur FSK-ja do të shndërrohet në Forcë të Armatosur.