Të rinjtë e AAK-së identifikojnë mangësitë

Gjilan – Kryetari i Aleancës së të Rinjve të Kosovës – Dega në Gjilan Labinot Hyseni, në kuadër të javëve të takimeve me përfaqësues institucional dhe atyre të organizatave jo-qeveritare lokale, gjatë ditës së shtune ka pasur dy takime të radhës.

Hyseni bashkë me disa nga anëtarët e kryesisë së tij, kanë pritur në selinë e AAK-së në Gjilan, në takime pune, Selim Dakun drejtor i Qendrës Kosovare për Diplomaci (QKD) si dhe kryetar i Unionit të Studentëve Pro Evropian (USPE), si dhe Ardit Ajvazi nënkryetar i USPE-së dhe Mejdi Sadiku sekretar i USPE-së.

“Qëllimi e këtyre dy takimeve, njëjtë si edhe i takimeve të zhvilluara më parë, është njohja për së afërmi me problemet dhe preokupimet e të rinjve në Gjilan, në veçanti të studentëve. ARK në Gjilan, po punon në mënyrë intensive në identifikimin e këtyre mangësive, për të punuar më pas në gjetjen e alternativave për zgjidhjen e këtyre problemeve dhe parregullsive”, ka thënë Hyseni.

Ndërkaq, Selim Daku, drejtor i QKD-së, ka falënderuar ARK-në e Gjilanit për ftesën, ndërsa ka folur për aktivitetet që qendra që ai drejton, ka organizuar së fundi. Ai gjithashtu ka falënderuar AAK-në për mbështetjen e vazhdueshme në shumë aktivitete të mëparshme, ndërsa ka shtuar se si organizatë jo-qeveritare, kanë bashkëpunime të mira si me partitë politike, poashtu edhe me OJQ, organizata qeveritare etj.

Sa i përket takimit me nënkryetarin e USPE-së Ardit Ajvazi dhe sekretarin e USPE-së Mejdi Sadiku, janë diskutuar kryesisht çështje që kanë të bëjnë drejtpërdrejtë me interesin e të rinjve studentë në Gjilan.

“Studentët e Gjilanit kanë nevojë për më shumë kabinete pune në ambientet e fakultetit, zgjerimin e amfiteatrove, rregullimin e bibliotekës me kushte më të mira pune, angazhimin në procesin e digjitalizimit dhe funksionalizimin e tij si dhe shmangien dhe evitimin e problemeve në raportin profesorë-studentë”, është shprehur nënkryetari i USPE-së Ardit Ajvazi, duke folur për nevojat e studentëve të Gjilanit.

Ai ka shtuar gjithashtu, duke thënë se pothuajse shumica e këtyre kërkesave janë realizuar nga Unioni i Studentëve Pro Evropian, të cilët gjithmonë i kanë marrë parasysh këto kërkesa dhe janë munduar të ofrojnë zgjidhje.

Në këto dy takime janë prekur çështjet që prekin të rinjtë e Gjilanit, ndërsa Aleanca e të Rinjve në Gjilan, ka shënuar ato probleme të cilat mund të konsiderohen si shqetësuese në të ardhmen, nëse nuk ndërmerret ndonjë veprim për zhdukjen e tyre.

Në këto takime, kanë marrë pjesë edhe Blerita Korça, Eugen Iseni, Shkumbin Fazliu, Saranda Rashiti, Bukurije Baftiu dhe Arbëreshë Kryeziu, anëtarë të kryesisë së ARK-së në Gjilan./rajonipress/