Të riatdhesuarit injorohen nga shteti

Gjatë tetë muajve të parë të këtij viti nga vendet evropiane janë riatdhesuar rreth 14 mijë kosovarë, të cilëve u është refuzuar statusi i azilkërkuesit. Pjesa më e madhe e tyre janë nga vendet si Gjermania, Austria dhe Zvicra.

Qeveria e Kosovës ka një program përmes së cilit synohet që personave të riatdhesuar (disave prej tyre) t’iu ndihmojë të riintegrohen në shoqëri. Me këtë program parashihet pagesa për banesën personave që nuk kanë pasur kushte se ku të vendosen, si dhe ushqimin dhe disa gjëra tjera për një periudhë të caktuar kohore.

Megjithatë, nga ky program nuk përfitojnë të riatdhesuarit që janë larguar nga vendi pas muajit korrik të vitit 2010, gjë e cila vlerësohet si e padrejtë, pasi që vetëm fundvitin e kaluar dhe këtë fillimvit besohet se janë larguar mbi 100 mijë kosovarë.

Zyra për Informim e Ministrisë së Punëve të Brendshme (MPB) ka bërë të ditur se gjatë këtij viti janë riatdhesuar rreth 14 mijë qytetarë. “Që nga 1 janari deri në fund të muajit gusht 2015 janë riatdhesuar 13944 persona. Kryesisht janë të riatdhesuar nga Gjermania, Austria, Zvicra dhe vendet tjera”, ka bërë të ditur kjo Zyrë, duke thënë po ashtu se Qeveria e Kosovës e ka strategjinë për riatdhesim.

“Qeveria e Kosovës e ka Strategjinë për riintegrimin e personave të riatdhesuar dhe planin e saj të veprimit, si dhe Rregulloren për riintegrimin e personave të riatdhesuar”, thuhet në tej në përgjigjen e Zyrës për Informim në MPB-së. Megjithatë, nga ky program përfitojnë vetëm ata të cilët janë larguar nga vendi para muajit gusht të 2010-s./zeri/