Talenti i madh i Baselit, Leon Avdullahu drejt Bundesligës – marrëveshja mund të mbyllet për 8 milionë euro

TSG Hoffenheim është shumë pranë sigurimit të shërbimeve të talentit shqiptar të FC Basel, Leon Avdullahu.

Sipas raportimeve nga gazetarët e Sky Germany, Patrick Berger dhe Florian Plettenberg, mesfushori 21-vjeçar është afër transferimit në Bundesligë.

Thuhet se klubi gjerman ka rënë dakord të paguajë 8 milionë euro plus bonuse për Avdullahun, megjithatë, marrëveshja ende nuk është zyrtarizuar dhe futbollisti është në pritje të vizitave mjekësore përpara finalizimit të transferimit.

Leon Avdullahu ka kaluar një rrugëtim të gjatë me klubin zviceran, duke u transferuar nga FC Solothurn në vitin 2018 dhe duke u ngjitur me shpejtësi nga akademia e Baselit deri tek ekipi i parë.

Deri tani, ai ka regjistruar 41 paraqitje me ekipin senior dhe është vlerësuar për aftësitë e tij të mbrojtjes dhe shkallën e lartë të pasimeve të sakta – plot 90.2% në sezonin 2024/25.

Mesfushori, i cili është pjesë e ekipit kombëtar zviceran U-21, shihet si një përforcim i rëndësishëm për Hoffenheimin, që kërkon të forcojë mesfushën në prag të sezonit të ri. /Telegrafi/