S’ka standarde të dyfishta për Kosovën

Eurodeputetja, Tanja Fajon, e cila u bë e famshme te shqiptarët pas propozimit që në Parlamentin Evropian të miratohet Rezoluta për heqje të vizave për Shqipërinë, mezi po pret që të njëjtën gjë ta bëjë edhe për qytetarët e Kosovës.

Ajo konsideron se dialogu Kosovë-Serbi është i domosdoshëm pasi vetëm nëpërmjet tij, mund të përmirësohen kushtet e jetës së qytetarëve të të dyja vendeve.

Në intervistë për “Tribunën”, Fajon ka thënë se veriu i Kosovës është problem si për njerëzit që jetojnë atje, si për faktin që është burim i krimit të organizuar për gjithë rajonin. Fajon nuk e ka ndarë mendimin që Komisioni Evropian është duke përdorur kute të dyfishta në raport me Kosovën, në aspektin e hapjes së mundësive për integrim të këtij vendi në familjen e gjerë evropiane. Në këtë kontekst, ajo ka thënë se në Kosovë duhet të dëshmohet respektimi i ligjit.

“Nuk mjafton vetëm ekzistimi i ligjeve në letër. Ato duhet të funksionojnë në praktikë”, është shprehur eurodeputetja nga Sllovenia.