Sipërmarrës të suksesshëm, intelektualë, atdhetarë dhe mbështetës të shumë aktiviteteve

Kamenicë – Vëllezërit Kamer dhe Mustafë Borovci janë ndër sipërmarrësit (biznesmenët) më të suksesshëm jo vetëm të regjionit të Gjilanit po edhe të Kosovës. Janë pronarë të Fabrikës së Bllokave “Brickos” SH.P.K., të ndërmarrjes “Vëllezërit Borovci” SH.P.K. dhe të disa ndërmarrjeve të tjera në të cilat punojnë mbi 120 punëtorë.

Fabrika e Bllokave “Brickos” SH.P.K. në Crepanë prodhon blloka të një cilësie shumë të lartë, të mirë në pamje, me të cilët punohet shpejtë dhe me lehtësi, po që janë të fortë dhe të qëndrueshëm, falë materialit me të cilin janë punuar, teknologjisë ndër më modernet dhe respektimit të të gjitha proceseve e standardeve më të avancuara gjatë procesit të prodhimit. Kjo fabrikë është ndër më modernet, jo vetëm në Kosovë, por edhe në rajon. Posa të hysh brenda kompleksit të fabrikës sheh se gjithçka është e projektuar dhe ndërtuar me shije, gjithçka është funksionale dhe e mirëmbajtur. Në vitin 2002 kur vëllezërit Mustafë dhe Kamer Borovci kanë filluar ta vënë në prodhim fabrikën, thuajse gjithçka ka qenë në zero, disa makina të amortizuara, jashtë funksionit, të vjetra dhe të keqmenaxhuara. Me qindra fabrika në Kosovë kanë qenë në gjendje shumë më të mirë, por pas privatizimit ose janë shitë për hekur ose u është ndërruar destinacioni dhe sot janë restorante, shitore, ose ambiente të shëmtuara.

Ndërmarrja tjetër “Vëllezërit Borovci” SH.P.K. merret me ndërtimtari. Ajo e ka ndërtuar dhe vazhdon ta ndërtojë kompleksin banesor “Fidanishtja” në Gjilan. Në këtë kompleks banesor gjithçka është projektuar dhe e ndërtuar sipas standardeve më të larta. Puna kryhet me profesionalizëm dhe cilësi, duke i respektuar me përpikëri të gjitha aktet ligjore e nënligjore, duke i zbatuar të gjitha procedurat, monitorimet e testimet dhe duke u pajisur me të gjithë dokumentacionin e nevojshëm.

Përveç sipërmarrës të suksesshëm Kameri e Mustafa janë edhe intelektualë të mirëfilltë, atdhetarë e humanistë. Me ta mund të bisedosh për libra, për letërsi, për kulturë, për histori dhe kuptohet për ekonomi. Nuk e di ku e gjejnë gjithë atë vullnet, gjithë atë energji, gjithë atë kohë për t’u marrë me të gjitha këto aktivitete. Edhe unë habitem si e gjejnë mundësinë që krahas angazhimeve të shumta për t’i menaxhuar me sukses ndërmarrjet t’i lexojnë gjithë ato libra. Vërtet është kënaqësi të bisedosh me ta për libra, duke hyrë edhe në detaje. Shumë gjëra konkrete nga ekonomia i kam mësuar falë bisedave që i kam pasur me Kamerin dhe Mustafën. Këta t’i tregojnë gjërat thjesht, qartë e shqip. Kanë ditur ta lidhin teorinë me praktiken dhe të arriturat shkencore e teknologjike t’i vënë në funksion të zhvillimit të ndërmarrjeve të cilat i kanë krijuar dhe i menaxhojnë.

Këta sipërmarrës gjatë viteve nëntëdhjetë i kanë paguar me rregull kontributet për Këshillin për Financim, kanë dhënë kontribut të vazhdueshëm në organizimin dhe financimin e shumë aktiviteteve që kanë qenë në dobi të popullatës, kanë dhënë ndihma për njerëzit në nevojë, i kanë mbështet aktivitetet e ndryshme kulturore etj.

Pas çlirimit të Kosovës kanë dhënë kontribut të çmuar në rindërtimin dhe në zhvillimin e ekonomisë. Ku ka atdhetarizëm më të madh se sa të ndikosh në zhvillimin e e vendit tënd, të punësosh njerëz, t’i aftësosh në aspektin profesional, t’i zbatosh ligjet, t’i kryesh obligimet? Në ndërmarrjet që i menaxhojnë këta dy sipërmarrës të gjithë të punësuarit kanë kontrata të punës; pagat u paguhen në llogari bankare një herë në muaj, pa asnjë vonesë; u paguhet kontributi pensional, sigurimi shëndetësor; e gëzojnë të drejtën në pushim javor, vjetor, mjekësor etj. Për sa i përket respektimit dhe zbatimit të ligjit të punës janë shembull për të mirë.

Këta sipërmarrës, përmes ndërmarrjeve të tyre, u kanë dalë në ndihmë shumë njerëzve herë në mënyrë të drejtpërdrejtë e herë duke i ndihmuar shoqatat e ndryshme bamirëse , humanitare. Kanë ndihmuar në ndërtimin e dhjetëra shtëpive për skamnorë, duke dhënë falas blloka ndërtimor, kanë dhënë mjete të shumta për shërimin e të sëmurëve, i kanë ndihmuar të varfrit etj. Disa njerëzve në nevojë u japin ndihmë mujore të përhershme të ngjashme me pensionet.
Kanë ndihmuar dhe sponsorizuar shumë klube sportive që merren me atletikë, karate, shah, pastaj manifestime të ndryshme sportive dhe të ngjashme.

I kanë ndihmuar dhe sponsorizuar shumë aktivitete kulturore, duke e financuar botimin e librave, revistave, i kanë mbështet klubet dhe organizatat e ndryshme.

Prej vitit 2021 janë sponsor i rregullt i klubit letrar “Nositi” të Dardanës. Falë këtij sponsorizimi klubi ka kryer shumë aktivitete si: Orë letrare, promovim të librave, konkurse letrare në të cilat janë shpërblyer punimet më të mira në poezi dhe në prozë, i ka botuar disa numra të revistës letrare-kulturore “Nositi”, i ka botuar me dhjetëra libra, ka marrë pjesë në aktivitete të ndryshme letrare në Gjilan, Viti, Prishtinë, Skenderaj, Kaçanik, Istog, Kumanovë, Shkup, Kukës dhe në disa qytete të tjera./sinan sadiku/rajonipress/