Sigurimi shëndetësor, nga janari 2015

Familjet e varfra, të burgosurit, të moshuarit, personat me aftësi të kufizuara, familjet e dëshmorëve… lirohen nga pagesat e sigurimeve shëndetësore.

Mbledhja e kontributeve për sigurim shëndetësor është paraparë të fillojë nga një tetori i këtij viti. Ndërsa ofrimi i sigurimit shëndetësor, sipas agjendës së Ministrisë së Shëndetësisë për funksionimin e Ligjit për Sigurim Shëndetësor pritët të ndodhë prej janarit të vitit 2015 – shkruan gazeta Zëri.

Faik Hoti, drejtor i departamentit të Informimit në këtë Ministri ka thënë se Projektligji për Sigurime Shëndetësore ofron shërbime shëndetësore më të mira për qytetarët. “Qytetarët do të paguajnë premiume (me përjashtim të kategorive të liruara), ndërsa do të marrin shërbime shëndetësore shumë më kualitative se tani”.

Më tej ai ka shtuar se “Sipas një llogaritjeje të bërë nga ekspertët parashikohet që në vitin e parë të zbatimit të Sigurimit Shëndetësor buxhetit të shëndetësisë t’i shtohen rreth 80 milionë euro, që paraqet gati dyfishim të menjëhershëm të buxhetit, duke llogaritur buxhetin aktual prej 117 milionë eurove”.