Shumica e komunave shkojnë në balotazh

Partitë politike nuk do t’i matin forcat vetëm këtë të diel, më 3 nëntor, kur edhe do të mbahen zgjedhjet lokale, pasi që më shumë se gjysma e komunave të Kosovës pritet të shkojnë në balotazh, me ç’rast do të ketë raund të dytë votimesh.

Sipas analistëve politikë, shumica e qendrave të mëdha do të shkojnë në balotazh, pasi që në raundin e parë nuk do të arrijnë të shënojnë fitore, duke marrë më shumë se 50 për qind të votave të përgjithshme.

Adnan Merovci, njohës i procesit zgjedhor, konsideron se qendrat e mëdha siç janë: Prishtina, Prizreni, Gjilani, Ferizaj, e ndoshta edhe Mitrovica mund të shkojnë në balotazh.

”Shumica absolute e komunave do të shkojnë në balotazh, përveç disa komunave që janë bastione të padiskutueshme të një subjekti të caktuar politik. Në këtë drejtim sa i përket demokracisë, mendoj se kjo nuk prish punë, por përkundrazi i kontribuon asaj”, ka thënë ai për “Zërin”.

Sipas tij, se shumë komuna të Kosovës do të shkojnë edhe në raundin e dytë të votimit bazohet në faktin se shumë parti politike janë konsoliduar mirë dhe kanë krijuar strategjitë e tyre…(Zëri)