Shton kërkesat

Behgjet Pacolli, përveç Ministrisë së Zhvillimit Ekonomik, do t’ia kërkojë Hashim Thaçit edhe një Ministri tjetër ose katër poste zëvendësministrash. Këto vende atij i duhen për Partinë e Drejtësisë, e cila përmes një letre, i ka kërkuar gjysmën e posteve qeveritare. Ndërkohë, për Ministër të Zhvillimit Ekonomik, kandidat i AKR’së është Fadil Ismajli, aktualisht drejtor i KOSTT’it.

Behgjet Pacolli po pret kthimin e Hashim Thaçit nga Koreja e Jugut që të nisë bisedimet për ri-dizajnimin e Qeverisë së Kosovës.

Këto janë ndryshimet e para në Ekzekutiv, qysh kur dy liderët nënshkruan marrëveshje për bashkëqeverisje, dy vjet më parë.

Në takimin e fundit është rënë dakord që Ministria e Zhvillimit Ekonomik t’i jepet Koalicionit për Kosovën e Re, por Pacolli duket se është i shtrënguar t’i kërkojë Thaçit edhe poste të tjera qeveritare.

Burime të Gazetës Express kanë thënë se Partia e Drejtësisë, e cila garoi në zgjedhjet e fundit me KKR’në, përmes një letre i ka kërkuar Kryetarit të AKR’së hise shtesë.

“Partia e Drejtësisë kërkon të paktën dy poste zëvendësministrash ose Ministrinë e Kulturës apo atë të diasporës”, ka thënë një zyrtar i AKR’së për Express në kushte anonimiteti.(xpress).