Shërbyesit Civil duan 30 për qind rritje pagash

Federata e Sindikatave të Shërbyesve Civilë të Republikës së Kosovës, ka kërkuar që paga e tyre të rritet deri në 30 për qind e jo 20 % sa pretendon Qeveria e Kosovës
Gjithashtu, ata kanë kërkuar që të implementohet ligji për shërbyesit civil, pasi që implementimi i tij është dashur të fillojë në janar të vitit të kaluar. Kështu ka deklaruar Hajrullah Hoxha, kryetari i FSSHCRK-së.

Edhe reformat në sistem dhe kategorizimi në administratën institucionale, sipas tyre duhet të bëhen sipas kritereve dhe standardeve Ligjore.

Hoxha tha se për një pagë dinjitoze, FSSHCRK-ja kërkon një rritje prej 30% të pagës.

“Masat prej 50 % duken pak anakronike duke i pasur parasysh shumë sektorë të tjerë që duhet të ngritën. Prodhimi duhet të ngritët, duhet të gjenerohet punësimi dhe e ardhura në kuadër të Qeverisë së Kosovës. Prandaj i kemi pasur parasysh gjitha elementet që rrjedhin nga treguesit ekonomiko-financiar, dhe kemi marr vendimin e tillë kryesia, që të dalim me kërkesa siç është 30 % në ngritjen e pagave si dhe ajo të shoqërohet me sigurimin e transportit dhe të shujtës,”, ka thënë Hoxha.

Ai tha se zvarritja e zbatimit të ligjit të pagave për shërbyesit civil ka dëmtuar mirëqenien e shërbyesve civil në përgjithësi.

Për këtë ai tha se FSSHCRK-ja kërkon urgjentisht implementimin e ligjit të pagave për shërbyesit civil.

“ FSSHCRK-ja kërkon urgjentisht të implementohet ligji i pagave për shërbyesit civil dhe të bëhet edhe kompensimi retroaktiv qysh nga janari i 2013-ës, si dhe të bëhet harmonizimi i shportës së konsumit me paga. Rritja e pagave për kategoritë e shërbyesve civil të bëhet në bazë të kësaj forme, deri në masë sa nuk dëmtohet buxheti i shtetit. FSSHCRK-ja është e vetëdijshme se rritja e pagave për shërbyesit civil nuk e dëmton buxhetin e Kosovës, por do të krijojë mirëqenie më të mirë për shërbyesit civil, institucionet dhe në përgjithësi për shoqërinë kosovare” tha ai.

E për reformat në sistemin dhe kategorizimin në administratën e institucioneve të Kosovës, ata thanë se duhet të bëhen në mënyrë që mos t`i dëmtojë shoqërinë civile, edhe pse sipas tyre ka indikacione se do të ketë shkurtime të vendeve të punës në administratën shtetërore.

“FSSHCRK-ja kërkon që reformat të bëhen sipas kritereve dhe standardeve ligjore, e kurrsesi të bëhen reforma sipas preferencave dhe rrethanave momental” tha Hoxha.

Ndryshe, Federata e Sindikatave të Shërbyesve Civilë të Republikës së Kosovës, është bashkim i shoqatave sindikale të shërbyesve civil në institucionet e Republikës së Kosovës. FSSHCRK u themelua në prill të vitit 2013 dhe është e regjistruan në Ministrinë e Punës dhe Mirëqenies Sociale, konform Ligjit për Aktivitetet Sindikale në Kosovë.

Ndryshe edhe Sindikalistët e Bashkuar të Arsimit Shkencës dhe Teknologjisë duan që pagat e tyre të rriten për 30 për qind e jo 20 për qind siç ka premtuar kryeministri i Kosovës në mbledhjen e Qeverisë.