Kryeministri Hashim Thaçi ka deklaruar se normalizimi i marrëdhënieve të Kosovës me Serbinë është domosdoshmëri, porse sipas tij, Beogradin e pengon mentaliteti i së kaluarës. Ai i ka thënë se e kupton hezitimin e serbëve të veriut për të pranuar institucionet e Kosovës, pasi kanë jetuar prej 12 vitesh me mashtrimet e Beogradit për ndarje.
“I pengon që kanë mbetur ende peng i atij mentaliteti dhe atij veprimi gjenocidal që kanë kryer në Kosovë. Ende lidershipi i tyre jeton me ëndrrat e së kaluarës, prandaj lidershipi në Beograd duhet të çlirohet nga e kaluara dhe të shohë nga e ardhmja, të marrë vendime përkatëse për normalizimin e marrëdhënieve me shtetin e Kosovës”, ka thënë kryeministri në një intervistë për Zërin e Amerikës.
“Kosova ka një subjektivitet të fuqishëm tani ndërkombëtar. Mund të ndodhë fqinjësia e mirë edhe pa njohje reciproke, por që nënkupton normalizimin e marrëdhënieve të një perspektive evropiane gjithë-rajonale”.
Duke folur për mënyrën se si mund të zgjidhet çështja e veriut të Kosovës, që banohet nga shumicë serbe, kryeministri Thaçi tha se ai i kupton hezitimet e serbëve në veri, por atyre u duhet thënë e vërteta.
“Unë kam prezantuar planin tim në kryeqytetet më të rëndësishme të botës për integrimin e serbëve të veriut në institucionet e Kosovës, për lëvizjen e lirë, për sundimin e ligjit, për rend dhe demokraci, për zgjedhje të lira, për zgjedhjen e lidershipit legjitim në detyrë të tri komunave, por edhe për investime ekonomike”.
“Prandaj, ajo që Serbia mund t’i ndihmojë më së tepërmi qytetarët serbë në veri të Mitrovicës është t’u thotë të vërtetën se pjesa veriore e Mitrovicës është Kosovë, se ata duhet t’i bashkangjiten institucioneve kosovare. I kuptoj hezitimet e tyre, sepse kanë jetuar 12 vite me mashtrimet e Beogradit për ndarje. Nga 25 korriku i vitit të kaluar ajo ëndërr e Beogradit është shuar një herë e përgjithmonë dhe do të punojmë për të ardhmen evropiane me integritetin territorial të njohur ndërkombëtarisht të Kosovës”.
