Selver Lenjani zhgënjehet në Qeverinë, i drejtohet kryetarit të Kamenicës

Gjilan – Selver Lenjani ka bërë disa kërkesa radhazi për ta takuar Ramush Haradinajn, por pa sukses. Duke parë këtë neglizhencë të Qeverisë, Lenjani i është drejtuar Qëndron Kastratit duke kërkuar prej tij një angazhim maksimal rreth vijës kufitare dhe problemeve që kanë banorët e kësaj zone kufitare.

Ramush Haradinaj nuk ka mbetur njeri pa e takuar e pritur në zyrën e tij, por nuk i ka dalur kohë për delegacionin e Karaqevës.

Selver Lenjani i cili ka shpresuar kot tek Ramush Haradinaj thotë se është i zhgënjyer që pas shumë kërkesave për takim, nuk ka arritur ta realizojë një të tillë dhe kjo ka ndikuar që ai t`i drejtohet zyrtarisht edhe kreut të Kamenicës Qëndron Kastratit.

Lenjani tha se ka kërkuar nga Kastrati një angazhim më të madh në sensibilizimin dhe trajtimin e problemit të vijës kufitare.”Kamenica dhe zona kufitare janë ata që e përjetojnë të keqen dhe ju duhet ta merrni mbi supet tuaja këtë problem madhor për brezin kufitar” i ka shkruar Lenjani kreut të Kamenicës.

Sipas Lenjanit, Karaqeva është lënë anash dhe në shumë fusha mungojnë investimet. “Ne jemi të izoluar sepse në njërën anë është Serbia që na provokon dhe nuk na lenë rehat dhe në anën tjetër janë institucionet tona që në heshtje na injorojnë dhe nuk merren fare me kontestin e vijës kufitare” shprehet Lenjani.

Lenjani thotë se nuk do të ndalet së lobuari dhe punuari për Karaqevën dhe sfidat që atë e presin në vitin 2018./rajonipress/