Sejdiu mohon se do t’i bashkohet partisë së Limajt
RajoniPress
20:28, 20 Shkurt, 2014
(E plotesuar) – Kryetari i nderit të Lidhjes Demokratike të Kosovës, Fatmir Sejdiu, në një prononcim për Telegrafin ka deklaruar se nuk do t’i bashkohet partisë e cila pritet të formohet nga ish deputeti i Partisë Demokratike të Kosovës, Fatmir Limaj.
“Absolutisht jo, s’ka asgjë të vërtetë. As idenë më të vogël nuk e kam pse ka dalë kjo mëdyshje”, ka thënë Sejdiu.
Ndryshe, ish nënkryetari i PDK-së, Fatmir Limaj, ka paralajmëruar se shumë shpejtë do të formojë parti politike.
“Nga viti 2012 unë më nuk e kam parë vetën pjesë të PDK-së. Pra, sot edhe publikisht dhe formalisht e them se e pushoj aktivitetin tim në PDK. Ne shumë shpejt do të dalim me një ofertë të re politike para qytetarëve të Republikës së Kosovës”, kishte deklaruar gjatë një emisioni televiziv. /Telegrafi/
————————————————————
Fatmir Sejdiu i bashkohet partisë së Fatmir Limajt?
Kryetari i Nderit të LDK’së, Fatmir Sejdiu ka gjasa t`i bashkohet subjektit që shumë shpejt pritet të themelohet nga Fatmir Limaj, i cili para pak ditësh u largua nga PDK.
Burime të Express kanë treguar se Sejdiu dhe Limaj kanë treguar afërsi ndërmjet tyre edhe në të kaluarën dhe tashmë kanë biseduar që ish -Presidenti të jetë njëri nga themeluesit e subjektit më të ri.
Për këtë nismë, Sejdiu dhe Limaj kanë marrë edhe përkrahjen e njerëzve të afërt të tyre.
“Limaj po dëshiron që të ketë sa më shumë njerëz të të gjitha profileve në partinë e tij”, ka thënë një zyrtar i afërt me bisedimet që po zhvillohen.
Express ka provuar të kontaktojë me Sejdiun dhe Limajn, por asnjëri s’është përgjigjur thirrjeve të gazetës.
Aktualisht, Limaj është duke i bërë përgatitjet e fundit për themelimin e partisë së re, derisa Fatmir Sejdiu ka bërë përpjekje për të penguar kandidimin e Isa Mustafës si Kryeministër i LDK’së.
Fatmir Sejdiu në mbledhjen e Këshillit Drejtues të LDK’së doli i vetëm kundër kandidaturës së Isa Mustafës për Kryeministër, derisa nismën e tij s’e kanë përkrahur as Naim Jerliu e Bahri Thaçi, i cili ka kërkuar rikthimin e Sejdiut në krye të LDK’së./express/
