“Saliu me karrocë”, e çon regjisorin kosovar në garë ndërkombëtare

Sali Saliu nga fshati Hajvali i Prishtinës, thotë se i ka 50 vjet, por nuk e di se në cilën datë ka lindur. Ai ka dëshirë të punojë, por nuk po mund të gjejë asnjë vend të lirë, sepse siç shprehet “Me t’njofshëm po shkon aty”. Ai detyrohet çdo mëngjes të shkojë në këmbë në Prishtinë, për të punuar me karrocë. Thotë se nëse nuk e bën këtë punë, nuk ka çfarë me ngrënë.

Kjo është jeta e përditshme e Saliut, të cilën e rrëfen në dokumentarin e shkurtër të regjisorit Visar Sopjani. Me këtë rrëfim, Sopjani ka konkurruar në një garë e cila atij mund t’i sjellë përfitime si regjisor i ri. Bëhet fjalë për një garë në rrjetin social ‘Facebook’, të organizuar nga “My First Job In Film”.

Sopjani u ka bërë thirrje të gjithë dashamirësve që të klikojnë në këtë faqe për të votuar dokumentarin e tij.

Votimet do të zgjasin deri më 30 qershor. “Dokumentarin e kam gjiruar në Kosovë, si projekti final i Masterit që e kam mbaruar në nëntor 2012 në Filmmaking (Master of Arts). Xhirimet janë bërë në Hajvali dhe në Prishtinë. Fokusi i dokumentarit është që t’i mëson dhe lajmëron shikuesit për një stil ekstrem të jetës të një personi në Kosovë.

Për më tepër se si ky stil jete sjell mungesë të gjërave materiale në jetë dhe si mungesa e këtyre sendeve vetëm përforcon përcjelljen e vlerave familjare të një babai deri te fëmijët e tij. Dokumentari e ka një stil narrativ. Ndodhjet e ditëpërditshme shpjegohen nga Saliu dhe përkrahen me imazhe të pasura me aktivitet”, ka thënë Sopjani.