Salihu: Raporti i gjysmë vitit, reflekton përkushtimin tonë ndaj qytetarëve dhe zhvillimit të qëndrueshëm të qytetit

Gjilan – Drejtoria për Gjeodezi, Kadastër dhe Pronë e Komunës së Gjilanit, ka publikuar raportin gjashtëmujor të punës së këtij viti (1 janar deri më 30 qershor). Edhe në këtë sektorë po vazhdon përmirësimi i procesit të ofrimit të shërbimeve. “Gjatë gjysmës së parë të këtij viti kemi pranuar dhe trajtuar me efikasitet një numër të madh të lëndëve dhe kërkesave me rëndësi për qytetarët dhe institucionet”, tha Bekim Salihu, drejtori për Gjeodezi, Kadastër dhe Pronë.

Ai tregoi edhe për numrin e lëndëve të pranuara sipas sektorëve nga 1 janari deri më 30 qershor.
Në gjeodezi janë pranuar 2 mijë e 720 lëndë, ku 99.8% janë të përfunduara.
Kadastër ishin 1 mijë e 866 lëndë dhe janë kryer 97.6%.

Në sektorin e pronës ishin 410 lëndë, ku janë përfunduar të gjitha apo 100%.
“Janë skanuar dhe digjitalizuar rreth 270 mijë dokumente arkivore kadastrale, duke rritur efikasitetin dhe sigurinë e të dhënave”, tha Bekim Salihu.

Drejtori për Gjeodezi, Kadastër dhe Pronë, tregon edhe për numrin e certifikatave të lëshuara.
Ku janë lëshuar 5 mijë e 528 certifikata të pronës, 343 certifikata të gjendjes ekonomike dhe 225 certifikata që dëshmojnë se nuk posedojnë pronë.

Më tej drejtori Bekim Salihu, tha se të hyrat financiare për këtë periudhë kapin vlerën prej 91 mijë e 565 euro.

Sipas tij po ashtu, janë përgatitur dhe miratuar nga Qeveria e Kosovës, vendime të rëndësishme për shpronësime, që përfshijnë: projekte komunitare në Dobërçan, ndërtimin e “Çerdhes së Fëmijëve” – INTEGJ, unazën e jashtme të qytetit të Gjilanit, rrugët dhe pronat në Livoq të Epërm/Ulët dhe ZK Velekincë dhe projektin “Qarkorja e vjetër e qytetit”.

“Ky raport reflekton përkushtimin tonë ndaj qytetarëve dhe zhvillimit të qëndrueshëm të qytetit. Do të vazhdojmë me transparencë dhe efikasitet në shërbim të komunitetit”, tha Salihu./rajonipress/