Rugova: S’bëjmë qeveri me PDK-në

Nënkryetari i Lidhjes Demokratike të Kosovës, Haki Rugova, ka theksuar se nuk do të ishte mirë nëse pas zgjedhjeve nacionale LDK-ja do të hynte në koalicion me PDK-në, për shkak të dështimeve të PDK-së, që kur ka filluar ta udhëheqë ekzekutivin e vendit.

Rugova tha për Telegrafin se LDK-ja është duke u angazhuar që në zgjedhjet nacionale të dalë partia më e madhe në vend.

“Për mua, për kryesinë e partisë dhe për anëtarësinë e gjerë, do të ishte e papranueshme hyrja në koalicion me një parti, e cila në historinë e saj të udhëheqjes me qeverinë kosovare, ka dështuar”, ka thënë Rugova.

Njëri nga figurat kryesore të LDK-së, Lutfi Haziri, kishte deklaruar për media se nuk e sheh të arsyeshme koalicionin e mundshëm të partisë së tij me PDK-së, për shkak që sipas tij, partia në pushtet nuk ka çfarë t’i jap vendit.

“Nëse i japim dimension të integrimit kombëtar, LDK-së i konvenon koalicioni me Vetëvendosjen, për shkak të përputhjeve të planprogrameve”, ka thënë Haziri.