Rruga e asfaltuar ia ndryshon pamjen fshatit Çelik

Gjilan – Nga një fshat i braktisur dhe pa kushte elementare për jetesë, tash fshati Çelik është bërë i gjallë dhe i është ndërruar komplet pamja.

Rruga e asfaltuar ia ka kthyer shpresat fshatit Çelik i cili pothuajse ishte zbrazur për shkak të kushteve të rënda.

Janë banorët e mbetur ata që i janë gëzuar asfaltimit të rrugës dhe shprehin entuziazmin e tyre që më në fund do të mbizotërojë gjallëria edhe në këtë fshat të largët të Gjilanit.

Shefket Bajrami është njëri nga aktivistët që nuk është ndalur asnjëherë duke kërkuar që kjo rrugë të asfaltohet nëse do të mbetej ndonjë banor atje. “vërtet jam i lumtur sepse ëndrra ime u bë realitet. Jemi të gëzuar dhe falënderues ndaj të gjithë atyre që kanë dhënë kontribut që ky fshat sot të buzëqesh dhe të ndihet i lumtur për këtë investim tejet domethënës” tha Bajrami.

Bajrami tha se fshati ka marrë një pamje mahnitëse dhe ka disa familje që kanë shprehur dëshirën për të rinisur një jetë të re./rajonipress/