Rriten “pagat ekstra” në ministritë e Rexhepit dhe Çitakut

Ministrja e Integrimit Evropian, Vlora Çitaku dhe kolegu i saj, ministri i Punëve të Brendshme, Bajram Rexhepi, do t’i gëzojnë vartësit e tyre më shumë sesa vetë kryeministri, Hashim Thaçi. Derisa ky i fundit pritet t’i rrisë pagat e punonjësve të sektorit publik për 20%, ministrat Çitaku e Rexhepi kanë arritur të sigurojnë ekstra paga për një pjesë të stafit të tyre që konsiderohen ‘tru deficitar’.

Ministri i Administratës Publike e ka prezantuar të enjten në mbledhjen e Kabinetit Qeveritar propozimin e Komisionit për Fondin për Kuadro për disa ndryshime të linjave buxhetore nëpër ministri, për t’ua mundësuar resorëve të Rexhepit dhe Çitakut rritjen e shumës për Fondin për Kuadro.

Siç ka sqaruar ministri Yagcilar, pajtueshmëria për ndryshimet në Fondin për Kuadro është arritur në takimin e datës 19 shkurt 2014. “Si rezultat i këtij takimi, Komisioni i Fondit për Kuadro u pajtua që të propozohet për në mbledhjen e Qeverisë plotësim-ndryshimi i Vendimit të Qeverisë Nr. 11/79 i datës 20.06.2012 që ka të bëjë me shpërndarjen e mjeteve financiare në ministritë përfituese të ndryshohet dhe plotësohet si në vijim: Shuma e ndarë për Ministrinë e Financave prej 225 mijë euro të ulet në shumën prej 220 mijë euro. Gjithashtu shuma e ndarë prej 25 mijë euro për Ministrinë e Forcës së Sigurisë të fshihet në tërësi”, thuhet në propozimin e Yagcilar që e ka siguruar Tribuna…(Tribuna).