Reagon Hoti pas mosmiratimit të Rezolutës për dialogun: Për çfarë të flasim tjetër nëse nuk pajtohemi në këtë pikë

Shefi i Grupit Parlamentar i Lidhjes Demokratike të Kosovës (LDK), Avdullah Hoti pas mosmiratimit të Projekt-rezolutës së propozuar nga partia e tij lidhur me “angazhimet e Presidentit të Kosovës për përfshirjen e ‘shkëmbimit të territoreve’ apo ‘korrigjim të kufijve’ ka thënë se nuk kanë më se çka të flasin nëse nuk pajtohen për këtë pikë.

Hoti në një postim në rrjetin social Facebook tha se as Presidenti, e askush tjetër, nuk ka të drejtë të negociojë për territorin e Republikës së Kosovës.

“Kjo është pika e rezolutës e riformuluar:

‘1. Kuvendi i Republikës së Kosovës rithekson se Kushtetuta e Republikës së Kosovës, sovraniteti shtetëror, integriteti territorial dhe karakteri shtetëror unitar i Republikës së Kosovës janë të pacenueshme.

As Presidenti, e askush tjetër, nuk ka të drejtë të negociojë për territorin e Republikës së Kosovës’.

Kjo është Rezoluta që nuk u mbështet. Për çfarë të flasim tjetër nëse nuk pajtohemi në këtë pikë bazike”, shkruan Hoti.

Ndryshe, deputetët e Kuvendit të Kosovës nuk miratuan Projekt-Rezolutën e propozuar nga Lidhja Demokratike e Kosovës lidhur me “angazhimet e Presidentit të Kosovës për përfshirjen e ‘shkëmbimit të territoreve’ apo ‘korrigjim të kufijve’. /Telegrafi/