Ramadan Sadriu profesor frymëzues dhe lider natyral që la gjurmë e vlera

Nga Betim A. Osmani – Profesor Ramadan Sadriu (Dani) u lind në fshatin Sllubicë të Gjilanit, me 2 qershor 1954, nga një familje arsimdashëse. Zotri Ramadani kreu shkollën fillore në vendlindje, shkollën e mesme në Gjilan, dhe u diplomua më pas nga Universiteti i Prishtinës në Sociologji dhe Filozofi. Punoi si profesor i Sociologjisë dhe Filozofisë në Gjimnazin “Zenel Hajdini” të Gjilanit ku dhe kontribuoi deri në vdekje. Ai bëri shumë për të siguruar edukim kualitativë pranë Gjimnazit ku ligjëronte lëndën e Sociologjisë dhe Filozofisë.

Ishte profesor i shkëlqyer, një frymëzues, një administrator i ndërgjegjshëm dhe lider natyral ku la gjurmë dhe vlera të mëdha për brezat e ardhshëm. Sikurse gjatë bisedave të lira, ashtu edhe në ligjërime ishte modest dhe gjithnjë pranë nxënësve të tij.

Ai ishte një profesor i përkushtuar i Sociologjisë dhe Filozofisë. Me 6 korrik 2009 Gjilani dhe Kosova humbi një njeri të madh, që gjithë jetën ia kushtoi arsimit me urtësi të madhe dhe mjeshtri profesionale.

Si nxënës i Profesor Ramadan Sadriut gjatë vijimit të mësimeve në Gjimnaz, ndihem shumë krenar që kisha rastin të isha një prej nxënësve të tij. Ai ishte shumë i dashur me miqtë e tij, kolegët dhe studentët. Është kënaqësi të përkujtosh një profesor, një mik modest, një udhëzues siç ishte Prof. Ramadan Sadriu.

Miqtë, njohësit e punës së tij, si dhe qytetarët gjilanas vlerësojnë shërbimin që ia bëri arsimit gjilanas dhe përgjithësi Kosovës.