Qeveria: Nuk ndikohemi nga “dridhjet politike” të Listës Serbe

Qeveria e Kosovës, paralajmërimet e Listës Serbe se mund të dalë nga koalicioni, i sheh si të pandikueshme për qëndrueshmërinë e Qeverisë që udhëhiqet nga kryeministri Isa Mustafa, shkruan Gazeta Express. Zëdhënësi i kryeministrit, Faton Abdullahu, tha për Gazetën Express se “epiqendra e kësaj “dridhjeje politike” është Beogradi, prandaj ato nuk mund të shkaktojnë kurrfarë dridhje, bile as ndikime në Prishtinë”.

“Vendimi i Listës Serbe e ka bazën aty ku nuk mund të jetë i qëndrueshëm në refuzim të vendimeve të ligjshme e demokratike të Qeverisë dhe Kuvendit të Republikës së Kosovës mbi Trepçën”, tha Abdullahu.

Abdullahu më tej thekson: “Konsiderojmë se ngrirja e pjesëmarrjes në institucione e Listës Serbe është ngrirje e mundësisë për të vazhduar pjesëmarrjen në përfitimet dhe realizimin e të drejtave nga më të ndryshme që janë aktive dhe në begati e tutje, për komunitetin serb në Kosovë”.

Ndërsa, kryetari i Listës Serbe, Sllavko Simiq, ka thënë sot për mediat, se miratimi i ‘Trepçës’ nga Kuvendi mund të sjellë që Lista ta braktisë koalicionin qeverisës.

“Thjesht, duhet të gjithë ta kuptojnë se sa është e rëndësishme kjo për të gjithë ne dhe nëse mbeten të shurdhër dhe memec ndaj kësaj, atëherë rekomandimi im personal do të jetë që ta braktisim Qeverinë. Ndërkaq, do të shohim se cili do të jetë vendimi i Listës Serbe në tërësi”, ka thënë Stojanoviq.

Bojkotimi i Listës Serbe e ka vënë në pozitë të vështirë koalicionin për arsyen se nuk ka votat e mjaftueshme për të kaluar projektligjet me rëndësi të veçantë, si Demarkacioni.

Ndërkaq, nga opozita zëdhënësi i Aleancës për Ardhmërinë e Kosovës (AAK), Muharrem Nitaj, ka thënë për Express-in se edhe nëse Lista Serbe largohet nga koalicioni qeverisës, AAK-ja nuk do të pranojë ftesa të mundshme nga koalicioni për bashkëqeverisje.