Qeveria arnohet me rishpërndarjen e buxhetit

Qeveria në detyrë ka konsumuar gjysmën e asaj pjese të buxhetit shtetëror që mund t’ia ndërrojë destinimin. Brenda dy javësh ka rishpërndarë 36.5 milionë euro.

Me propozim të ministrit të Financave, Besim Beqaj, ekzekutivi ka vendosur të mërkurën që nga kursimet e deklaruara të shpërndajë 6.917.074 euro. Ministria e Shëndetësisë ka përfituar më së shumti – mbi 4 milionë euro, të cilat janë destinuar për leukemi dhe për barna. Nga pjesa tjetër, Ministria e Arsimit ka përfituar 1.7 milionë euro, ndërsa Ministria e Jashtme, 1 milion euro. Në Ministrinë e Jashtme kanë kaluar edhe 100 mijë euro që në buxhet prezantoheshin si të Ministrisë së Punëve të Brendshme, shkruan sot Koha Ditore.

Vendimi është mbështetur në Ligjin mbi Buxhetin për vitin 2014 dhe në Ligjin mbi menaxhimin e financave publike, sipas të cilave, duke filluar nga data 1 tetor, ministri i Financave ka autorizim që t’i propozojë dhe t’i rekomandojë Qeverisë që të bëhet rishikimi i disa pozicioneve të buxhetit në shumën totale prej 5 për qind nga vlera totale e Buxhetit të Kosovës. Tërësia e buxhetit për sivjet është 1.590 miliardë euro, 5-përqindëshi i të cilit është rreth 79 mijë euro.