Gjilan – Në një mbrëmje të përbashkët me rastin e pensionimit të profesoreshës Zizë Ismajli, kolektivi i Gjimnazit Matematikor “Xhavit Ahmeti”, ka vlerësuar lart punën e sakrificën e profesoreshës, duke theksuar se profesoresha Zizë ismajli ka lënë gjurmë të pashlyera në këtë kolektiv të dijës.
Drejtori i Gjimnazit Natyror “Xhavit Ahmeti”, Bekim Mustafa, në një fjalim rasti ka çmuar lart personalitetin e profesoreshës Ismajli. “Ishe një shembull se si një pedagoge për një kohë të gjatë në arsim, dha tërë dijen e saj për nxënësit e saj që aq shumë i deshi e i edukoi nuk kam fjalë, por arsimit do t`i mungoni për një kohë të gjatë”.
Poashtu fjalë miradije kishte edhe profesoresha Hyrmyze Shkodra, duke theksuar: “Profesoresha Zizë Ismajli ishte shembull për të gjithë mësimdhënësit edhe pse karrierën e saj në arsim e filloi në kohën më të vështirë të arsimit Kosovar”.
Zizë Ismajli e cila me dinjitet duke lënë gjurmë të pa shlyera në procesin mësimor para kolegëve të saj ka bërë të ditur. “Nga zemra i falënderohem tërë kolektivit, dhe se çdo fillim ka edhe fundin e saj. Ndihem krenare që i kam takuar këtij kolektivi shembullor, ju dëshiroj gjitha të mirat çdo mësimdhënësit dhe çdo nxënësi që me punët e juaja të bëni arsimin krenar dhe shkollën tuaj”.
Zizë Ismajli karrierën prej mësimdhënëse e filloi në vitin 1991-92, kur ish-sistemi Serb po largonte nxënësit shqiptarë nga objektet shkollore, ndërsa studimet e Letërsisë dhe Gjuhës Shqipe i kreu në Fakultetin Filozofik në Prishtinë.
Profesoresha Zizë Ismajli është nënë e tre fëmijëve: Arbrit, Artës dhe Arbenit, si dhe nipërve Arti, Ari, Aldi, Arbesi, Enari dhe Rubeni.
Zizë Ismajli ishte bashkëshortja e profesorit të Gjuhës Shqipe, e drejtorit të shkollës së mjekësisë “Asllan Elezi” e aktivistit të njohur të çështjes kombëtare Ruzhdi Ismajli i cili ndërroi jetë në vitin 2005./rajonipress/
