Procesi i privatizimit i parë nga artistët

Derisa shtete të ndryshme kishin paraqitur sistemin e privatizimit të vendeve të tyre me ilustrime të ndryshme, Kosova kishte zgjedhur një formë tjetër. Në një pikturë, e cila në sipërfaqe ishte e ngjyrosur me të zezë, në mes të saj shkruante me të kuqe “O Hajn”.

Ky punim ishte i punuar nga artisti Fatmir Mustafa në vitin 2007 por që kuratorët e kësaj ekspozite kishin vendosur që pikërisht këtë punim ta bëjnë pjesë të kësaj ekspozite. Privatizimi i institucioneve dhe infrastrukturës ka qenë tema e ekspozitës e cila është mbajtur në Qendrën e Artit Bashkëkohor ‘Stacion’.

Kjo ekspozitë e quajtur ‘Likuidimi’ ka mbledhur punime të artistëve nga vende të ndryshme. Në njërën pjesë të objektit të qendrës ‘Stacion’ ishte ekspozita e artistëve kroat, e cila paraqitej përmes një videoje, e cila fliste për këtë proces. Më pas, në dhomën tjetër, ishin pjesëmarrësit e tjerë, idetë e të cilëve ishin të paraqitura me ikona dhe ilustrime të një sistemi që ata konsideronin se zhvillohet në vendet e tyre.(Tribuna)