“Prekazi 2002”, kujtesa që nuk shuhet dhe rrëfimi i mjekut që i shërbeu së vërtetës

Disa fotografi të publikuara në rrjetet sociale nga eksperti i njohur i mjekësisë ligjore Arsim Gërxhaliu riktheu sot një nga kapitujt më të dhimbshëm, por edhe më të rëndësishëm të kujtesës sonë kombëtare. Nën mbishkrimin e shkurtër “Lavdi përjetësisht, Prekaz 2002”, ai solli në kujtesë momentet e zhvarrimit dhe identifikimit të trupave të familjes së komandantit legjendar Adem Jashari në Prekaz.

Pas atij imazhi qëndron një histori e gjatë sakrifice dhe përkushtimi profesional. Në vitet pas luftës, kur plagët e Kosovës ishin ende të hapura, mjekët ligjorë dhe ekspertët e identifikimit u përballën me një mision të rëndë: të gjenin, të identifikonin dhe t’u kthenin familjeve të tyre trupat e të vrarëve nga forcat e regjimit të Slobodan Milloshević. Në mesin e tyre ishte edhe Arsim Gërxhaliu, një profesionist që nuk u kursye as nga lodhja, as nga dhimbja që bartnin ato momente.

Ai dhe kolegët e tij ecën me orë të tëra në këmbë, qëndruan ditë e net të gjata në terren dhe në laboratorë, duke realizuar ekspertiza mjekoligjore në kushte shpesh të vështira, por me një qëllim të vetëm, që e vërteta të mos mbetej e varrosur bashkë me viktimat. Çdo identifikim ishte një akt drejtësie, një kthim i dinjitetit për familjet dhe një dëshmi e krimeve që nuk duhet të harrohen.

Imazhet dhe fotot e sotshme të publikuara nga Arsim Gërxhaliu janë më shumë se një kujtim personal. Ai është një thirrje për të mos harruar sakrificat e luftës dhe për të respektuar ata që, me profesionalizëm dhe integritet, punuan për të dokumentuar të vërtetën historike të Kosovës.

Në një shoqëri që ende kërkon drejtësi për plagët e së kaluarës, figura e tij mbetet shembull i përkushtimit ndaj shkencës, etikës dhe humanizmit, një profesionist që e vuri dijen në shërbim të së vërtetës dhe të dinjitetit të viktimave.

Lavdia e Prekazit jeton në histori, por edhe në ndërgjegjen e atyre që punuan që ajo histori të mos mbulohej nga harresa./rajonipress/